Mertherynsi an Seyth Broder

1Y hwarva ynwedh bos dalghennys seyth broder ha'ga mamm hag i konstrynys gans an myghtern, yn-dann dorment gans hwyppys ha kroenow, dhe vlasa kig mogh anlaghel. 2Mes onan anedha, neb a gewsis ragdha, a leveris, ‘Pandr'a vynnydh govynn po dyski ahanan? Rag parys on dhe verwel kyns treuspassya erbynn laghow agan tasow.’

3An myghtern a goedhas yn konnar, ha gorhemmynna may fe poethys padellow ha kowdarns. 4An re ma a veu poethys distowgh, hag ev a worhemmynnis may fe treghys yn-mes taves an leveryas ha may pillyens kroghen y benn ha treghi yn-mes y dhiwleuv ha'y dreys yn golok y vreder erell ha'y vamm. 5Pan o diweres yn tien, an myghtern a worhemmynnis may fo kemmerys dhe'n tan yn few, ha friys yn padell. Mog dhiworth an badell a omlesas yn ledan, mes an vreder ha'ga mamm a gennerthas an eyl y gila dhe verwel yn nobyl, ow leverel, 6‘Yma an Arloedh Duw ow mires orthyn hag yn gwiryonedh y'n jeves truedh warnan, dell dheklaryas Moyses yn y gan a dhustunias erbynn an bobel dh'aga fasow, pan leveris, “Hag ev a'n jevydh truedh war y wesyon.” ’

7Wosa an kynsa broder dhe verwel y'n fordh ma, i a dhug yn-rag an nessa rag gul ges anodho. I a skwardyas an groghen a'y benn gans an gols, ha govynn orto, ‘A vynnydh dybri, po bos dha gorf kessydhys lith wosa lith?’ 8Ev a worthybis yn y vammyeth, ‘Na vynnav.’ Ytho ev, yn y dro, a wodhevis an keth tormentys par dell wrug an kynsa. 9Hag orth y dhiwettha anall, ev a leveris, ‘Ty ganjon mollothek, ty a'gan dannvon a'n bewnans a-lemmyn, mes Myghtern an ollvys a wra agan drehevel dhe nowydhheans bythkwethek a vewnans, drefenn ni dhe verwel rag y laghow.’

10Wosa hemma, an tressa o ges aga gwari. Pan veu gorhemmynnys, ev a ystynnas y daves distowgh ha profya yn-rag y dhiwleuv yn kolonnek, 11ha leverel yn nobyl, ‘Gans Nev my a gavas an re ma, ha rag y laghow my a's dispres, hag a-dhiworto govenek a'm beus aga daskavoes.’ 12An myghtern y honan ha'n re esa ganso o sowdhenys orth spyrys an den yowynk ma, rag ny wrug fors vytholl a'y wodhevyansow.

13Wosa ev ynwedh dhe verwel, i a gammdhyghtyas ha tormentya an peswora y'n keth fordh. 14Pan dheuth yn ogas dh'y vernans, ev a leveris, ‘Gwell yw bos gorrys dhe'n mernans gans tus, ages hepkorr an govenek Duw dhe'm drehevel arta. Mes ragos jy ny vydh dasserghyans dhe vewnans.’

15Ena i a dhug yn-rag an pympes ha'y debeldhyghtya. 16Mes ev a viras orth an myghtern, ha leverel, ‘Drefenn bos genes awtorita yn mysk mab-den, kynth os marwel, ty a wra an pyth a vynni. Mes na dyb Duw dhe eskasa agan kenedhel. 17Gorta pols, ha gweles fatell wra y alloes meur dha dormentya ty ha dha dhiyskynnysi.’

18War y lergh i a dhug yn-rag an hweghves. Pan o ogas dhe'n mernans, ev a leveris, ‘Na omdoell yn euver. Rag ni a wodhev an taklow ma a'gan govis ni, wosa pegha erbynn agan Duw agan honan. Rakhenna an taklow revedh ma re hwarva. 19Mes na dyb nag ylli bos ankessydhys wosa assaya omladh erbynn Duw!’

20An vamm o fest marthys ha gwiw dhe gov enorys. Kyn hwelas hy seyth mab ledhys a-ji dhe unn jydh, hi a'n dug gans kolonn dha drefenn hy govenek y'n Arloedh. 21Hi a gennerthas pubonan anedha yn aga mammyeth. Lenwys a brys nobyl, hi a grevhas hy resnans benel gans kolonnekter gorow, ha leverel dhedha, 22‘Ny wonn fatell dheuthewgh y'm torr. Nyns o my a ros dhywgh bewnans hag anall, ha nyns o my a arayas an elvennow yn pub onan ahanowgh. 23Ytho Kreador an bys, neb a dhevisyas genesigeth mab-den ha diskudha dallethvos pup-tra, a wra yn y dregeredh daskorr bewnans hag anall dhywgh arta, a-ban dhispresowgh agas honan a-barth y laghow.’

24Antioghus a dybis y vos ow pos dyghtys gans bismer, ha doutya a son hy lev hy dh'y geredhi. Ha'n yowynka broder hwath yn few, ny elwis Antioghus warnodho yn geryow hepken, mes ynwedh ev a ambosas gans tiow gul dhodho bos gour kevoethek ha gwynn y vys mar treylya a fordhow y dasow, hag ynwedh ev dh'y gemmeres avel y goweth ha'y worra yn charj a soedhow poesek. 25A-ban na vynna an gour yowynk goslowes orto vytholl, an myghtern a elwis war an vamm hag ynnia warnedhi kusulya an yowynk dhe omsawya. 26Wosa ev dhe ynnia warnedhi gans lies ger, hi a omgemmeras perswadya hy mab. 27Mes, owth omblegya nes dhodho, hi a gewsis yn aga mammyeth y'n fordh ma, ow skornya an turant fell: ‘Ow mab, kemmer truedh warnav. My a'th tug naw mis y'm torr, ha ri bronn dhis teyr blydhen, ha'th vaga ha'th tri dhe'n oes ma, ha'th witha. 28My a'th pys, ow mab, a vires orth an nev ha'n nor ha gweles pup-tra eus ynna, hag aswonn na's gwrug Duw a daklow esa ow pos. Hag y'n keth fordh ma mab-den ynwedh a dheuth yn bosva. 29Na borth own a'n tormentor ma, mes bydh wordhi a'th vreder. Degemmer dha vernans ma'th tegemmerriv arta yn tregeredh Duw gans dha vreder.’

30Ha hi hwath ow kewsel, an den yowynk a leveris, ‘Rag pyth yth esowgh ow kortos? Ny vydhav gostydh dhe worhemmynn an myghtern, mes my a vydh gostydh dhe worhemmynn an lagha a veu res dh'agan tasow gans Moyses. 31Mes ty, neb re dhevisyas pub eghenn a dhrog erbynn an Ebrowyon, yn sur ny dhienkydh a dhiwleuv Duw. 32Rag ni a wodhev drefenn agan peghosow. 33Ha mars yw serrys agan Arloedh bew pols berr, dh'agan keredhi ha dyskybla, ev a vydh unnver arta gans y wesyon y honan. 34Mes ty, kanjon ansans, ha'n moyha defolys a vab-den oll, na vydh drehevys yn euver ha hwythys gans govenek ansertan, pan dhrehevydh dha leuv erbynn fleghes nev. 35Ny dhienksys na hwath breus an Duw ollgalloesek, hag a wel pup-tra. 36Rag agan breder, wosa godhevel payn termyn berr, re eritas bewnans bythkwethek yn-dann gevambos Duw; mes ty, dre vreus Duw, a dhegemmer kessydhyans ewn drefenn dha valghder. 37My, kepar ha'm breder, a dhaskorr korf ha bewnans rag laghow agan tasow, ow kelwel war Dhuw dhe dhiskwedhes tregeredh yn skon dh'agan kenedhel ha dre hwyppys ha skorjys gul dhis avowa ev unnsel dhe vos Duw, 38ha dredhov vy ha'm breder dhe dhri dhe dhiwedh sorr an Ollgalloesek re goedhas yn ewn war agan kenedhel oll.’

39Ena an myghtern a goedhas yn konnar, ha'y dhyghtya gweth ages an re erell, ow perthi an skorn yn hwerow. 40Ytho ev a verwis andhefolys, ow korra oll y fydhyans y'n Arloedh.

41Diwettha oll, an vamm a verwis wosa hy mebyon.

42Bedhes hemma lowr, ytho, a-dro dhe dhybri kolodhyon sakrifisow hag a-dro dhe'n tormentys an moyha fell.