Rebellyans Yudas Makkabeus

1Y'n keth termyn Yudas, henwys ynwedh Makkabeus, ha'y gowetha a entras an trevow yn kevrinek ha gelwel war-barth aga neshevin hag omrolya an re a bessa len yn yedhowieth. 2I a elwis war an Arloedh dhe vires war an bobel o arweskys gans peub; ha kemmeres pita orth an tempel re bia defolys gans tus dhidhuw; 3dhe gemmeres truedh a'n sita esa ow pos distruys ha parys dhe vos levnys dhe'n dor; dhe woslowes orth an goes esa ow karma dhodho; 4dhe berthi kov a ladhva dhilagha an babanes ankablus ha'n blasfemiow gwrys erbynn y hanow; ha diskwedhes y gas a dhrogedh.

5Kettell gavas Makkabeus y bagas a-dro dhodho, ny ylli an Jentilys sevel orto, rag sorr an Arloedh re dreylsa dhe dregeredh. 6Ow tos heb gwarnyans, ev a worra tan yn sitys ha trevow. Ev a dhalghennas an tylleryow lesus, ow korra dhe'n fo moy es boghes a'n eskerens. 7Ev a gavas an nosow an moyha lesus rag omsettyansow a'n par ma. Ha kows a'y wouroleth a omlesas yn pub le.

8Pan welas Felip bos an gour ow kwaynya dor tamm ha tamm, hag owth avonsya moy ha moy gans y sewena, ev a skrifas dhe Ptolemi, governour Kelesyria ha Fenikia, dhe dhos ha gweres governans an myghtern. 9Ena Ptolemi a dhewisas dison Nikanor mab Patroklus, onan a gowetha arbennik an myghtern, ha'y dhannvon gans na le es ugens mil Jentil a bub kenedhel, dhe dhifeudhi oll kenedhel an Yedhewon. Hag ev a junyas ganso Gorgias, kaslewydh ha gour gans prevyans a vateryow breselek. 10Nikanor a erviras kowlwul rag an myghtern an trubyt a dela bos res dhe'n Romanyon, dew vil dalent, dre wertha an Yedhewon yn kethneth. 11Ytho ev a dhannvonas ger distowgh dhe sitys an arvor, orth aga gelwel dhe brena kethyon yedhowek hag owth ambosa ma's teffo deg korf ha peswar-ugens rag unn talent, heb gwaytyas breus an Ollgalloesek esa skon ow tos warnodho.

Darbar dhe Vresel

12Ger a dheuth dhe Yudas a-dro dhe dhevedhyans Nikanor; ha pan gewsis dh'y gowetha a dhevedhyans an lu, 13an re o ownek hag a gammfydhyas gwirvreus Duw a fias ha diank. 14Re erell a werthas pup-tra esa gesys dhedha, hag y'n keth prys i a bysis an Arloedh dhe sawya an re re bia gwerthys gans Nikanor ansans hwath kyns hwarvos an vatel; 15mar ny ve a'ga govis aga honan, ena a-barth an kevambosow gwrys gans aga thasow, ha drefenn ev dh'aga gelwel der y hanow sans ha gloryus. 16Mes Makkabeus a guntellas y luyow war-barth, bys yn hwegh mil aga niver, hag ynnia warnedha ma na vens ownekhes gans an eskerens ha ma na ownnens routh veur an Jentilys esa ow tos yn treus er aga fynn, mes dhe omladh yn kolonnek, 17ow kwitha a-rag aga lagas an outray anlaghel gwrys gans an Jentilys erbynn an tyller sans, ha tebeldhyghtyans an sita skornys, hag ynwedh domhwel aga bewnans hengovek. 18‘Rag i a drest yn arvow ha hardhder’, yn-medh ev, ‘mes ni a drest yn Duw Ollgalloesek, neb a yll gweskel dhe'n dor gans unn sin a'y benn an re usi ow tos er agan pynn, ha hwath, mars yw res, an bys oll.’

19Dres henna, ev a dherivas dhedha a'n prysyow pan dheuth gweres dh'aga hendasow, ha fatell veu kans ha peswar-ugens mil distruys yn termyn Sennagherib, 20ha termyn an vatel erbynn an Galatianys a hwarva yn Babylon, pan omladhas eth mil Yedhow ryb peswar mil Makedonian; mes pan veu gweskys an Makedonianys, an eth mil, der an gweres a dheuth a'n nev, a dhistruys kans hag ugens mil a'n Galatianys ha degemmeres preydh meur.

Yudas a Feth Nikanor

21Gans an geryow ma ev a's lenwis a golonnekter ha gul dhedha bos parys dhe verwel rag aga laghow ha'ga gwlas; ena ev a rannas y lu yn peder rann. 22Ev a apoyntyas y vreder ynwedh, Simon ha Yosep ha Yonathan, peub dhe ledya rann, ow ri dhe beub pymthek kans a wer. 23Ev a apoyntyas Eleazar ynwedh dhe lenna a'n lyver sans, hag a ros an arwoedh-goelyas, ‘Gweres Duw’; ena, owth hembronk an kynsa rann y honan, ev a junyas batel gans Nikanor.

24Dre weres an Ollgalloesek, i a ladhas moy es naw mil a'n eskerens ha golia hag evredhi brassa rann lu Nikanor, ha'ga gorra oll dhe'n fo. 25I a gemmeras arghans an re re dhothya dh'aga frena avel kethyon. Wosa aga chasya pellder lowr, res o dhedha dehweles drefenn bos diwedhes an our. 26An jydh kyns an sabot yth o, ha rakhenna ny bessons aga chasya. 27Pan guntellsens arvow an eskar ha'ga destryppya a'ga freydh, i a withas an sabot, ow ri gormel meur ha grasow dhe'n Arloedh, re's sawsa rag an jydh na ha'y ri dhedha avel dalleth tregeredh. 28Wosa an sabot i a ros rann a'n preydh dhe'n re a via tormentys ha dhe'n gwedhwesow ha'n omdhivasow; hag i a lesrannas an remenant yntredha aga honan ha'ga fleghes. 29Wosa gul hemma, i a wrug aspysadow kemmyn ha hwilas may fe an Arloedh tregeredhus unnverhes yn tien gans y wesyon.

Yudas a Feth Timothi ha Bagghides

30Owth omladh erbynn tus Timothi ha Bagghides, i a ladhas moy es ugens mil anedha ha settya dalghenn yn re a'n dinasow ughel, hag i a rannas myns pur vras a breydh ow ri dhe'n re a veu tormentys ha dhe'n omdhivasow ha'n gwedhwesow hag ynwedh dhe'n re goth, kevrennow kehaval dh'aga hevrennow aga honan. 31I a guntellas arvow an eskar, ha'ga gwitha oll gans rach yn tylleryow lesus; hag i a dhug remenant an preydh dhe Yerusalem. 32I a ladhas kaslewydh lu Timothi, gour fest ansans, hag onan re droblsa an Yedhewon yn feur. 33Pan esens ow koelya an vudhogoleth yn sita aga thasow, i a loskas an re re worrsa tan y'n porthow sans, Kallisthenes ha re erell, re fisa a-ji dhe unn chi byghan; ytho an re ma a dhegemmeras gober gwiw rag aga ansansoleth.

34An teyrgweyth milliges Nikanor, re dhrosa an mil varghador dhe brena an Yedhewon, 35wosa bos uvelhes dre weres Duw gans erbynnoryon a dybis aga bos a'n lyha bri, a dhiwiskas y dhillas splann ha holya y hyns yn unnik avel keth fowesik a-dreus an pow bys pan dheuth dhe Antiogh, wosa seweni dre vras yn distruyans y lu y honan. 36Ytho ev neb re omgemmersa fastya trubyt rag an Romanyon dre gethneth tus Yerusalem a dheklaryas bos Mentenour dhe'n Yedhewon, ha rakhenna an Yedhewon o anwoliadow, drefenn i dhe holya an laghow ordenys ganso.