1Leverewgh dh'agas breder, ‘Ammi’,2:1 Ammi: Styr an hanow yw Ow fobel. ha dh'agas hwerydh, ‘Ruhama.’2:1 Ruhama: Styr an hanow yw Y kavas truedh.

Dislelder Ysrael: Kessydhyans ha Daspren

2Kuhudhewgh agas mamm, kuhudhewgh:

rag nyns yw hi ow gwreg,

ha nyns ov vy hy gour.

Kemmeres hi hy dijastita mes a'y golok,

ha'y avoutri dhiworth hy diwvronn,

3ma na wrav vy hy destryppya noeth,

ha'y gorra kepar hag yn dydh hy genesigeth;

my a's gwrav avel gwylvos,

ha'y settya avel syghtir,

ha'y ladha gans syghes.

4Ny gemmerav truedh a'y fleghes,

rag fleghes avoutri yns i.

5Aga mamm a wrug avoutri,

hi neb a's omdhuk re oberis yn tivlas:

rag hi a leveris, ‘My a hol ow haroryon,

neb a re dhymm ow bara ha'm dowr,

ow gwlan ha'm lin, ow oyl ha'm diwes.’

6Rakhenna my a vynn keas dha2:6 dha: War-lergh an Septuagint ha'n Syriek hy. fordh gans spern;

ha'y degea gans fos,

ma na gaffo hy hynsyow.

7Hi a wra poenya war-lergh hy haroryon

mes ny yll drehedhes dhedha;

hi a's hwila, mes

ny yll aga havoes.

Ena hi a lever, ‘My a vynn mos,

ha dehweles dhe'm kynsa gour;

y feu gwell ragov ena es dell yw lemmyn.’

8Ny wodhva hi,

y feu my neb a ros dhedhi

an ys, ha'n gwin, ha'n oyl,

ha kressya hy arghans,

ha'y owr a bareussons rag Baal.

9Rakhenna my a dhaskemmer

ow ys yn y brys,

ha'm gwin yn y seson,

ha kibya dhe-ves ow gwlan ha'm lin

gansa may hwre hi kwetha hy noethedh.

10Lemmyn my a wra diskudha hy meth

a-rag dewlagas hy haroryon,

ha nagonan ny's delirv dhiworth ow leuv.

11My a worr diwedh dhe oll hy heudhder:

hy dy'goelyow, hy loeryow nowydh, hy sabotys,

hag oll hy dy'goelyow apoyntys.

12My a wra difeythya hy gwinbrennyer ha'y figbrennyer,

may leveris anedha,

‘Ow pewas yns i,

a rosons ow haroryon dhymm.’

My a's gwra goedhel,

ha bestes an gwel a's deber.

13My a wra hy hessydhya rag dydhyow an Baalim,

may leski offrynnow dhedha,

hag omafina gans hy bysowyer2:13 bysowyer: Po bysowyer-troen. ha'y gemmweyth,

ha mos war-lergh hy haroryon,

mes hi a'm ankovas, yn-medh an Arloedh.

14Ytho, awotta, my a wra hy dynya,

ha'y hembronk dhe'n difeyth,

ha my a gows yn hegar dhedhi.

15My a re dhedhi hy gwinlannow alena,

ha nans Akor avel daras govenek.

Ena hi a worthyp kepar hag yn dydhyow hy yowynkneth,

kepar hag y'n jydh may teuthons yn-bann yn-mes a bow Ejyp.

16Y'n jydh na, yn-medh an Arloedh, ty a'm gelow ‘Ow gour’, ha ny'm gelwydh byth moy ‘Ow Baal.’ 17My a gemmer henwyn an Baalim yn-mes a'y ganow, ha ny vydhons nevra kovhes orth aga henwyn. 18Y'n jydh na my a wra kevambos ragdha, gans bestes an gwel, gans ydhyn an ebron, ha pryves an dor. My a dhral an warak, an kledha ha'n gas dhiworth an tir, ha my a's gwrav dhe wrowedha yn saw. 19My a wra ambosa dhe'th temmedhi bys vynitha; my a wra ambosa dhe'th temmedhi yn ewnder ha gwirvreus, yn tregeredh hag yn truedh. 20My a wra ambos dhe'th temmedhi yn lenduri, hag ena ty a aswonn an Arloedh.

21Y'n jydh na my a worthyp, yn-medh an Arloedh, my a worthyp dhe'n nevow, hag i a worthyp dhe'n nor.

22Ha'n tir a worthyp dhe'n ys ha dhe'n gwin ha dhe'n oyl; hag i a worthyp dhe Yezreel.

23My a wra hy flansa ragov y'n tir.

My a gemmer truedh a Lo-ruhama,

ha leverel dhe Lo-ammi ‘Ty yw Ow fobel’;2:23 Lo-ruhama: Styr an hanow yw Ny gavas truedh. Lo-ammi: Styr an hanow yw Nyns yw ow fobel.

hag ev a lever, ‘Ty yw ow Duw.’