Myghterneth a Ewnder

1Otta, myghtern a reyn yn ewnder

ha pennsevigyon a wovern gans gwirvreus.

2Pubonan a vydh avel kudhva rag an gwyns,

ha skovva rag an annawel,

avel goverow dowr yn tir sygh,

avel an skeus a garrek bras yn tir skwith.

3Ena ny vydh deges dewlagas an re a wel,

ha diwskovarn an re a glew a woslow.

4Kolonn an re dhibreder a gonvedh godhvos,

ha taves an re a gews yn unn hokya a vydh freth ha kler.

5Ny vydh an foll gelwys nobyl namoy,

na ny vydh drogwas synsys dhe vos hel.

6Rag an foll a gews follneth,

ha' y golonn a wra droktra:

ev a wra taklow didhuw,

ow kewsel falsuri a-dro dhe'n Arloedh,

ow kul gwag enev an den nownek

hag ow skonya ri dowr dhe'n den mayth eus syghes dhodho.

7Sherewynsi an sherewa yw drog;

ev a dewl towlow

dhe dhiswul an voghosogyon gans lavarow gowek,

hwath pan vo klem an edhommek gwir.

8An den nobyl a dewl towlow nobyl,

hag y'n taklow nobyl ev a sev.

Benynes Yerusalem

9Sevewgh, hwi venynes yw attes, klewewgh ow lev;

myrghes fydhyansek, goslowewgh orth ow lavar.

10A-ji dhe blydhen ha nebes dydhyow

hwi a gren, hwi venynes fydhyansek,

rag trevas an grappys a fyll,

ha ni dheu trevas an frut.

11Krenewgh, hwi venynes yw attes;

skruthewgh, hwi yw fydhyansek;

omstryppyewgh ha bedhewgh lomm,

grogysewgh agas diwglun gans yskar.

12Gweskewgh war agas diwvronn rag an gwelyow desiradow,

rag an gwinbrennyer feyth,

13rag dor ow fobel

le may teu spedhas ha spern yn-bann,

rag oll an chiow heudh

y'n sita lowen.

14Rag an kastell a vydh forsakys,

tervans an sita a dhifyk;

Ofel ha'n tour-goelyas

a vydh grugek32:14 grugek: Po fowys. bys vykken,

lowena dhe asenes gwyls,

peurva dhe flokkys,

15erna vo an Spyrys dinewys warnedha a-wartha.

Ena an gwylvos a vydh tir feyth,

ha'n tir feyth a vydh synsys dhe vos koeswik.

Kres yn Reyn Duw

16Ena gwirvreus a drig y'n gwylvos,

hag ewnder a annedh an tir feyth.

17Ober gwiryonedh a vydh kres,

ha siwyans ewnder a vydh kosoleth ha sawder bys vykken.

18Ow fobel a drig yn peurva hebask,

yn annedhow saw, hag yn powesvaow kosel.

19Kyn fo an koeswik terrys yn-nans gans keser,

ha'n sita levenhes orth an dor,

20gwynn aga bys an re a wonis has ryb pub avon,

ha gasa dhe dreys an ojyon ha'n asen wandra yn rydh.