Yeremia yn Chi an Priweythor

1An ger hag a dheuth dhe Yeremia a-dhiworth an Arloedh, ow leverel: 2‘Sav, ha ke yn-nans dhe ji an priweythor, hag ena my a wra dhis klewes ow geryow.’ 3Ena my eth yn-nans dhe ji an priweythor, hag otta, yth esa owth oberi war an ros. 4Mes an lester esa orth y wul a bri o difasys yn leuv an priweythor, ytho ev a'n gwrug arta, lester arall, dell hevelis da dhe'n priweythor.

5Ena ger an Arloedh a dheuth dhymm, ow leverel: 6A ny allav gul genes kepar ha'n priweythor ma, A ji Ysrael? yn-medh an Arloedh. Otta, par dell yw an pri yn leuv an priweythor, yndella yth owgh y'm leuv vy, A ji Ysrael. 7Dhe unn prys my a gews a genedhel, hag a wlaskor, dh'y diwreydhya, dh'y therri dhe'n dor, ha dh'y distrui; 8mar treyl an genedhel na, a gewsis er hy fynn, a-dhiworth hy drogedh, my a gyv edrek a'n drogedh a vynnis y wul dhedhi. 9Ha dhe brys arall my a gews a genedhel, hag a wlaskor, dh'y drehevel ha dh'y flansa; 10Mar kwra hi drogedh y'm golok, heb goslowes orth ow lev, ena my a gyv edrek a'n drogedh a vynnis y wul. 11Ha lemmyn ytho, kews orth gwer Yuda, hag orth annedhysi Yerusalem, ow leverel: Yndellma y lever an Arloedh: Otta, my a furv drogedh er agas pynn ha devisya towl er agas pynn: dehwelewgh peub a'y fordh dhrog ha gul dh'agas fordhow ha'gas gwriansow bos da.

Gorthter Ysrael

12Hag i a leveris, ‘Nyns eus govenek: ni a hol agan towlow agan honan, ha pub huni a wra herwydh gorthter y golonn dhrog.’

13Rakhenna yndellma y lever an Arloedh:

Govynnewgh yn mysk an kenedhlow,

Piw re glewas traow a'n par ma?

An wyrghes Ysrael re wrug

tra pur euthyk.

14A wra ergh Lebanon gasa

karrek an gwel?

Po a wra dowrow an menydhyow pell desygha,18:14 desygha: Amendys. An tekst ebrow yw ankler.

an goverow yeyn ow resek?

15Mes ow fobel re'm ankovas,

i a lesk offrynnow dhe dhuwow koeg

neb a wrug dhedha trebuchya yn aga fordhow,

y'n hynsyow koth,

dhe gerdhes yn hynsyow

nag yns drehevys yn-bann,

16ow kul aga thir tra euthyk,

ha ges bys vykken.

Pubonan neb a dremen a vydh skruthys,

hag a shak y benn.

17Avel gwyns an duryen

my a's tewl a-les a-rag an eskar;

my a dhiskwedh dhedha ow heyn, yn le ow fas,

yn dydh aga therroes.

Bras erbynn Yeremia

18Ena i a leveris, ‘Dewgh, ha tewlel towlow erbynn Yeremia; rag ny vydh kellys an lagha dhiworth an oferyas, na kusul dhiworth an re fur, na'n ger dhiworth an profoes. Dewgh ha'y weskel gans an taves, ha na woslowyn dhe nagonan a'y eryow.’

19Goslow orthiv, A Arloedh,

ha klew lev ow erbynnoryon.

20A vydh drogedh attylys rag da?

Rag i re balasas pytt rag ow enev.

Porth kov my dhe sevel a-ragos

dhe gewsel da ragdha,

dhe dreylya dha sorr a-dhiworta.

21Ytho ro aga fleghes dhe'n divoetter,

ha'ga delivra dhe nerth an kledha;

ha re wrello aga gwragedh kelli aga fleghes,

ha'ga gwer bos gorrys dhe'n mernans;

ha'ga gwer yowynk ledhys gans an kledha yn batel.

22Re bo klewys kri a'ga chiow,

pan dhredh bagas a soudoryon warnedha a-dhistowgh:

rag i re balasas pytt dhe'm kachya,

ha kudha maglennow rag ow threys.

23Byttegyns, Arloedh, ty a woer

oll aga husul er ow fynn dhe'm ladha.

Na av aga hammweyth,

na dilea aga fegh a'th wolok,

mes gas i dhe vos domhwelys a-ragos.

Gwra aga dyghtya yn termyn dha sorr.