1Unnweyth a pe ow fenn dowrow,

ha'm dewlagas fenten a dhagrow,

mayth oellen dydh ha nos

rag an re ledhys a vyrgh ow fobel!9:1 An wers 9:1 yw niverys 8:23 y'n tekst ebrow ha'n Septuagint.

2A pe dhymm harber an dremenysi y'n gwylvos

may tiberthiv a'm pobel, ha mos anedha!

Rag avoutroryon yns i oll,

kuntelles a draytours.9:2 9:2 bys 9:26 yw niverys 9:1 bys 9:25 y'n tekst ebrow ha'n Septuagint.

3I a bleg aga thaves avel aga gwarak rag gowyow:

nyns yns kolonnek rag gwiryonedh war an nor;

rag yth ons a dhrogedh dhe dhrogedh,

ha ny'm aswonnons, yn-medh an Arloedh.

4Bedhewgh war peub a'y gentrevek,

ha na fydhewgh yn broder vyth:

rag pub broder yw purra toeller,

ha pub kentrevek a wra kerdhes gans sklanderyow.

5Hag i a wra toella peub y gentrevek,

ha ny wrons kewsel an gwiryonedh:

i re dhyskas aga thaves dhe gewsel gowyow,

ny yllons koedha yn edrek.

6Hys-ha-hys toell war doell,

i a nagh ow aswonn, yn-medh an Arloedh.

7Yndella ytho y lever Arloedh an luyow:

Otta, my a's purha ha'ga frevi;

rag fatell allav gul ken drefenn myrgh ow fobel?

8Aga thaves yw avel seth varwel;

kewsel toell a wra:

den a lever geryow kres dh'y gentrevek der y anow,

mes yn y golonn kontrewaytya a wra.

9A ny wrav vy aga hessydhya drefenn an traow ma? yn-medh an Arloedh:

a ny vydh ow enev diellys

war genedhel a'n par ma?

10Rag an menydhyow my a dhalleth oela ha kyni,

ha rag peurvaow an gwylvos y hwrav kynvann,

rag leskys yns, ma na yll nagonan tremena;

na ny yll tus klewes son an gwarthek;

hag ydhyn an nev ha'n bestes re fias;

gyllys yns.

11Ha my a wra dhe Yerusalem bos kalsow meyn,

ha fow owrgeun;

ha my a wra dhe sitys Yuda bos ynyal,

heb annedhyas.

12Piw yw an gour doeth, a yll konvedhes hemma, may kewsis ganow an Arloedh dhodho, ma'n disklerro? Prag yth yw an tir diswrys ha gwastys kepar ha gwylvos, ma na dremen denvyth? 13Hag yn-medh an Arloedh: Rag i re forsakyas ow lagha a settis a-ragdha, ha ny vons gostydh dhe'm lev, na kerdhes ynni, 14mes kerdhes war-lergh gorthter aga holonn aga honan, ha war-lergh an Baalim, hag a dhyskas aga thasow dhedha. 15Rakhenna yndellma y lever Arloedh an luyow, Duw Ysrael: Otta, my a vag an bobel ma gans fuelenn, ha ri dhedha dowr gwenonek dhe eva. 16My a wra aga skattra yn mysk an kenedhlow, na aswonnis naneyl i na'ga thasow: ha my a wra dannvon kledha war aga lergh bys pan y's diswrav yn tien.

Kynvann yn Yerusalem

17Yndellma y lever Arloedh an luyow:

Bedhewgh avisys, ha kriewgh war an kynoresow, may teffons;

ha dannvenewgh war-lergh an kynoresow konnyk, may teffons:

18Gwrens i fistena, ha kemmeres yn-bann kynvann ragon,

may tiverro agan lagasow gans dagrow

ha may frosso kreghyn agan lagasow gans dowr.

19Rag lev kynvann yw klewys yn-mes a Sion,

‘Ass on ni diswrys!

meth meur a'gan beus,

drefenn ni dhe asa an tir,

drefenn i dhe dewlel dhe'n dor agan annedhow.’

20Ytho klewewgh ger an Arloedh, hwi venynes,

ha gwres agas skovarn degemmeres an ger a'y anow,

ha dyskewgh kynvann dh'agas myrghes,

ha peub dh'y hentrevek galargan:

21‘Ankow re dheuth yn-bann dh'agan fenestri,

hag entra yn agan lysyow,

dhe dreghi an fleghes dhiworth an stretys,

ha'n wer yowynk dhiworth an plenys.’

22Kows, Yndellma y lever an Arloedh:

‘Hwath korfow tus a wra koedha

avel teyl war an mes,

avel an dhramm war-lergh an myser,

ha nagonan ny's kuntell.’

23Yndellma y lever an Arloedh: Na esewgh an den fur dhe vostya yn y furneth, na na esewgh an den krev dhe vostya yn y grevder, na na esewgh an den rych dhe vostya yn y rychys: 24Mes gesewgh an re a vost dhe vostya yn hemma, ev dhe'm konvedhes hag aswonn, ow bos an Arloedh; a wra tregeredh, gwirvreus, hag ewnder war an nor: rag y'n traow ma my a lowenha, yn-medh an Arloedh.

25Otta, yma an dydhyow ow tos, yn-medh an Arloedh, may kessydhyav oll an re yw trodreghys unnsel y'n kudhgenn; 26Ejyp, ha Yuda, hag Edom, ha'n Ammonysi, ha mebyon Moab, hag oll an re ma'th yw treghys blew aga thalyow; rag oll an kenedhlow ma yw antrodreghys, hag oll chi Ysrael yw antrodreghys y'n golonn.