Yaghheans Den Palsyes

Mat 9:1-8; Luk 5:17-26

1Hag arta ev a entras dhe Kapernaum wosa nebes dydhyow; ha klewys veu, ev dhe vos y'n chi. 2Ha hware2:2 War-lergh re a'n dornskrifow, nyns usi omma an ger hware. lies a omguntellas war-barth, ma nag esa na fella le ragdha, na hwath a-dro dhe'n daras; hag yth esa ow pregoth dhedha an ger. 3Hag y teuthons ow tri dhodho unn palsi, degys gans peswar den. 4Ha pan na yllens dos nes dhodho drefenn an routh, i a dhistias an to mayth esa; ha wosa i dhe derri dredho, i a dhellos dhe'n leur an gravath may hwrowedhi an palsi. 5Ha Yesu pan welas aga fydh, a leveris dhe'n palsi, ‘Mab, gevys yw dha beghosow.’ 6Mes yth esa re a'n skribys esedhys ena, hag ow resna yn aga holonn, 7‘Prag y kews an den ma yndella? Blasfemi a wra; piw a yll gava peghosow saw unnsel Duw?’ 8Ha desempis Yesu pan aswonnis yn y spyrys aga bos ow resna yndella yntredha aga honan, a leveris dhedha, ‘Prag y resnowgh hwi an taklow ma yn agas kolonn? 9Pyneyl yw esya, leverel dhe'n palsi “Gevys yw dha beghosow”, po leverel, “Sav, ha kemmer dha weli yn-bann ha kerdh”? 10Mes may hyllowgh godhvos bos dhe Vab an den galloes dhe ava peghosow war an bys’ (ev a lever dhe'n palsi) 11‘my a lever dhis, sav, ha kemmer dha weli yn-bann, ha ke dhe'th chi.’ 12Hag ev a sevis, hag ow kemmeres an gweli yn-bann a-dhesempis, ev eth yn-mes dherag a-wel anedha i oll, mayth esa marth dhedha i oll, ow kordhya Duw, ha leverel, ‘Bythkweth ny welsyn travyth a'n par ma.’

Galow Levi

Mat 9:9-13; Luk 5:27-32

13Hag ev eth yn-mes arta ryb an mor; hag oll an routh a dheuth dhodho, hag ev a's dyskas. 14Hag ow tremena, ev a welas Levi mab Alfeus esedhys orth an dollva, hag yn-medh ev dhodho, ‘Hol vy.’ Hag ev a sevis yn-bann ha'y holya.

15Ha pan o esedhys orth an voes yn y ji, lies toller ha peghador ynwedh o esedhys war-barth gans Yesu ha'y dhyskyblon; rag yth esa kals anedha, hag i a'n holya.2:15 i a'n holya: War-lergh re a'n dornskrifow i a'n holyas. 16Ha pan y'n gwelsons ow tybri gans peghadoryon ha tolloryon, yn-medh an skribys ha'n Fariseow2:16 an skribys ha'n Fariseow: War-lergh re a'n dornskrifow an skribys neb o Fariseow. dh'y dhyskyblon, ‘Prag ymava ow tybri hag eva gans tolloryon ha peghadoryon?’ 17Ha Yesu, pan glewas henna, a leveris dhedha, ‘Dhe'n re yw yagh nyns eus edhomm a vedhek, mes dhe'n re yw klav; nyns o'ma devedhys rag gelwel an re wiryon, mes peghadoryon.’

An Govynn a-dro dhe Benys

Mat 9:14-17; Luk 5:33-39

18Hag yth esa dyskyblon Yowann ha'n Fariseow ow kul penys owth hepkorr dybri; hag y teuthons ha leverel dhodho, ‘Prag y hwra dyskyblon Yowann ha dyskyblon an Fariseow penys, ha'th dyskyblon jy ny wrons penys?’ 19Ha Yesu a leveris dhedha, ‘A yll kowetha an gour pries gul penys, hedre vo an gour pries gansa? Hedre vo an gour pries gansa, ny yllons gul penys. 20Mes an dydhyow a dheu may fydh an gour pries kemmerys a-dhiworta, hag ena i a wra penys y'n jydh na.

21‘Ny wra denvyth gwrias darn a bann nowydh2:21 nowydh: Greka antroghys. war wisk koth; poken an darn a denn a-dhiworto, an nowydh a-dhiworth an koth, ha'n skward a vydh gweth. 22Ha ny wra denvyth gorra gwin nowydh yn gwingreghyn koth; poken an gwin nowydh a derr an kreghyn, ha'n gwin ha'n kreghyn a vydh diswrys; mes gwin nowydh a dal bos gorrys yn kreghyn nowydh.’

Terri Pennow-ys y'n Sabot

Mat 12:1-8; Luk 6:1-5

23Hag y hwarva, y tremenas ev der an ysegi y'n sabot; ha'y dhyskyblon a dhallathas gul troe'lergh,2:23 a dhallathas gul troe'lergh: Po a dhallathas mos yn-rag. ow terri an pennow-ys. 24Ha'n Fariseow a leveris dhodho, ‘Mir, prag y hwrons i an pyth nag yw lafyl y'n sabot?’ 25Hag ev a leveris dhedha, ‘A ny wrussowgh redya bythkweth pandr'a wrug Davydh, pan esa dhodho edhomm, hag yth esa nown dhodho ev ha dhe'n re esa ganso, 26fatell eth yn chi Duw yn dydhyow Abiathar an arghoferyas ha dybri torthow an ragworrans nag yw lafyl aga dybri saw gans an oferysi, hag a wrug aga ri ynwedh dhe'n dus esa ganso?’ 27Hag ev a leveris dhedha, ‘An sabot a veu gwrys rag mab-den, a-der mab-den rag an sabot; 28ytho Mab an den yw Arloedh ynwedh a'n sabot.’