An Den gans Leuv Wedhrys

Mat 12:9-14; Luk 6:6-11

1Hag ev a entras arta dhe'n synaga; hag yth esa den ena, gwedhrys y leuv. 2Hag i a aspia gluw orto, mar kwrella y yaghhe y'n sabot, may hallens y guhudha. 3Hag ev a leveris dhe'n den gwedhrys y leuv, ‘Sav y'n kres.’ 4Hag yn-medh ev dhedha, ‘Pyneyl yw lafyl, po gul da y'n sabot, po gul drog, sawya bewnans po ladha?’ Mes i a dewi. 5Ha wosa ev dhe vires a-dro orta gans sorr, hag ev grevys drefenn kaletter aga holonn, yn-medh ev dhe'n den, ‘Ystynn dha leuv.’ Hag ev a's ystynnas, ha'y leuv a veu restorys. 6An Fariseow eth yn-mes, ha dison i a omgusulyas gans an Herodianys er y bynn, fatell allens y dhistrui.

Routh ryb an Mor

7Mes Yesu a omdennas gans y dhyskyblon war-tu ha'n mor, ha routh veur a Alile a'n holyas, hag a Yudi; 8ha pan glewsons a bup-tra a veu gwrys ganso, routh veur a Yerusalem, hag a Idumea, hag a'n pow a'n tu arall dhe'n Yordan, ha'n pow a-dro dhe Tyr ha Sidon a dheuth dhodho. 9Hag ev a leveris dh'y dhyskyblon, may fe skath vyghan parys ragdho drefenn an routh, ma na wrellens y waska; 10rag ev a wrussa sawya lies, mayth esa kemmys a's teva plagys ow kwaska warnodho rag y dochya. 11Ha'n spyrysyon avlan, pan y'n gweli, esens ow koedha dhe'n dor a-dheragdho, ha garma, ow leverel, ‘Ty yw Mab Duw.’ 12Hag ev a erghis dhedha yn straght ma na wrellens y dhiskudha.

Dewis an Dewdhek

Mat 10:1-4; Luk 6:12-16

13Hag ev eth yn-bann y'n menydh, hag a elwis dhodho an re a vynnas ev; hag i a dheuth dhodho. 14Hag ev a apoyntyas dewdhek, neb a henwis abesteli,3:14 War-lergh re a'n dornskrifow nyns usi omma an geryow neb a henwis abesteli. may fens ganso, ha may halla ev aga dannvon mes rag pregoth, 15ha may fe dhedha galloes a yaghhe klevesow ha3:15 galloes a yaghhe klevesow ha tewlel mes dywolow: War-lergh re a'n dornskrifow galloes a dewlel mes dywolow. tewlel mes dywolow: 16dhe Simon3:16 dhe Simon: War-lergh re a'n dornskrifow hag ev a apoyntyas an dewdhek. Dhe Simon. ev a ros an hanow Peder; 17dhe Jamys mab Zebede, ha Yowann broder Jamys ev a ros an hanow Boanerges, henn yw, Mebyon Taran; 18hag Androw ha Felip, ha Bertyl, ha Matthew, ha Tommas ha Jamys mab Alfeus, ha Thaddeus, ha Simon an Kananyas; 19ha Yudas Skaryoth neb a wrug ynwedh y drayta.

Yesu ha Belzebul

Mat 12:22-32; Luk 11:14-23, 12:10

20Ev eth a-bervedh yn chi, hag yth esa an routh owth omguntell arta, ma na yllens kemmys ha dybri bara. 21Ha pan glewas y gerens henna, i eth yn-mes rag settya dalghenn ynno; rag i a leveri, ‘Varyes yw.’ 22Ha'n skribys neb a dheuth yn-nans a Yerusalem a leveri, ‘Yma ganso Belzebul, ha dre bryns an dhywolow ymava ow tewlel mes dywolow.’ 23Hag ev a's gelwis dhodho ha kewsel orta dre barabolennow, ‘Fatell yll Satnas tewlel Satnas yn-mes? 24Ha mar pydh gwlaskor rynnys er hy fynn hy honan, an wlaskor na ny yll sevel. 25Ha mar pydh chi rynnys er y bynn y honan, an chi na ny yll sevel. 26Ha Satnas mar kwrug ev sevel er y bynn y honan ha bos rynnys, ny yll ev sevel, mes yma dhodho diwedh. 27Mes ny yll denvyth entra dhe ji den krev, ha pylla y byth, marnas ev a golmo kyns oll an den krev; hag ena ev a byll y ji.

28‘Yn hwir y lavarav dhywgh, oll aga feghosow a vydh gevys dhe vebyon tus, ha'n blasfemiow kemmys a wrellons; 29mes neb a wrello blasfemi erbynn an Spyrys Sans ny'n jevydh gevyans bynitha, mes yw kablus a beghes nevra a bes’3:29 mes yw kablus a beghes nevra a bes: War-lergh re a'n dornskrifow mes gwiw yw dhe vos dampnys bynitha. 30– drefenn i dhe leverel, ‘Yma spyrys avlan dhodho.’

Mamm ha Breder Yesu

Mat 12:46-50; Luk 8:19-21

31Ha'y vamm ha'y vreder a dheuth, hag ow sevel a-ves i a dhannvonas dhodho, ha'y elwel. 32Ha routh o esedhys a-dro dhodho, hag yn-medhons dhodho, ‘Mir, yma dha vamm ha'th vreder3:32 ha'th vreder: War-lergh re a'n dornskrifow ha'th vreder ha'th hwerydh. a-ves orth dha hwilas.’ 33Hag ev a's gorthybis ow leverel, ‘Piw yw ow mamm ha'm breder?’ 34Hag ev a viras a-dro orth an re o esedhys yn y gyrghynn, hag yn-medh ev, ‘Ottomma ow mamm ha'm breder! 35Rag neb a wrello bodh Duw, an keth henna yw ow broder, ha'm hwoer, ha'm mamm.’