Yesu Neghys yn Nazareth

Mat 13:53-58; Luk 4:16-30

1Hag ev eth yn-mes alena, ha dos yn y vro y honan; ha'y dhyskyblon a'n siwyas. 2Ha pan o devedhys an sabot, ev a dhallathas dyski y'n synaga, ha lies, orth y glewes, a's teva marth, hag yn-medhons, ‘A-ble teuth dhodho an taklow ma? Ha pyth yw an furneth re beu res dhodho, ha'n oberow galloesek ma gwrys gans y dhiwla? 3A nyns yw hemma an ser prenn, mab Maria, broder Jamys ha Yoses ha Yudas ha Simon? hag a nyns usi y hwerydh omma genen?’ Ha sklandrys ens i anodho. 4Hag yn-medh Yesu dhedha, ‘Nyns yw profoes heb enor, saw yn y vro y honan, hag yn mysk y gerens y honan, hag yn y ji y honan.’ 5Ha ny ylli gul ena ober galloesek vytholl, marnas ev a worras y dhiwla war nebes klevyon ha'ga sawya. 6Ha marth o ganso drefenn aga diskryjyans.

Dannvon an Dewdhek

Mat 10:1, 5-15; Luk 9:1-6

Hag yth esa ow mos a-dro y'n trevow, ow tyski. 7Hag ev a elwis dhodho an dewdhek, hag a dhallathas aga dannvon yn-mes, dew ha dew; hag ev a ros dhedha galloes war spyrysyon avlan, 8ha gorhemmynna dhedha, ma na gemmerrens travyth war an hyns, saw unnsel lorgh; na bara, na skryp, na mona yn aga grogys, 9mes bos arghenys gans sandalyow; na gwiska diw bows. 10Hag yn-medh ev dhedha, ‘Pyle pynag yth yllowgh a-bervedh yn unn chi, ena trigewgh bys pan omdennowgh a'n tyller na. 11Ha py tyller pynag na vynno agas degemmeres, na'gas klewes, pan yllowgh alena, shakyewgh dhe-ves an doust a-dhann agas treys yn dustuni er aga fynn.’6:11 War-lergh re a'n dornskrifow yma omma an geryow Yn hwir y lavarav dhywgh, y fydh esya dhe Sodom ha Gomorra dydh breus es dell vydh dhe'n sita na. 12Ytho yth ethons yn-kerdh ha pregoth, may koettha tus yn edrek. 13Hag i a dewlis yn-mes lies dyowl, hag untya gans olew lies o klav, ha'ga sawya.

Mernans Yowann Besydhyer

Mat 14:1-12; Luk 9:7-9

14Ha myghtern Herod a glewas anodho, rag y hanow o aswonnys a-les, hag i a leveri,6:14 hag i a leveri: War-lergh re a'n dornskrifow hag yn-medh ev. ‘Yowann Besydhyer yw drehevys a'n re varow, ha dre henna yma an oberow galloesek owth oberi ynno ev.’ 15Re erell a leveri, ‘Ev yw Elias’; mes re erell a leveri, ‘Profoes yw, avel onan a'n brofoesi.’ 16Mes Herod pan glewas a leveris, ‘Yowann yw, neb a wrugavy y dhibenna; dasserghys yw a'n re varow.’6:16 ‘Yowann yw, neb a wrugavy y dhibenna; dasserghys yw a'n re varow.’: War-lergh re a'n dornskrifow ‘Yowann, neb a dhibennis, ev re beu dasserghys.’

17Rag Herod y honan a dhannvonsa dhe dhalghenna yn Yowann ha'y gelmi yn prison a-barth Herodias, gwreg y vroder Felip, rag ev a's demmedhsa; 18rag yth esa Yowann ow leverel dhe Herod, ‘Nyns yw lafyl ty dhe gemmeres gwreg dha vroder.’ 19Rakhenna Herodias a borthas avi er y bynn, hag a vynna y ladha, mes ny ylli; 20rag Herod a'n jeva own a Yowann, ow kodhvos y vos gour ewn ha sans, hag ev a'n gwitha saw; ha pan y'n klewas yth o ankombrys bras,6:20 yth o ankombrys bras: War-lergh re a'n dornskrifow ev a wre lies tra. mes ev a'n goslowi yn lowen. 21Ha pan o devedhys dydh gwiw, Herod a wrug gwledh yn y benn-bloedh dh'y dus vras, dh'y benn-gaptenyon ha dhe welhevin Galile; 22ha pan dheuth a-ji myrgh an Herodias na6:22 myrgh an Herodias na: War-lergh re a'n dornskrifow y vyrgh ev a Herodias. ha donsya, hi a blesyas Herod ha'n re esedhys ganso. Yn-medh an myghtern dhe'n voren, ‘Govynn orthiv pypynag a vynni ha my a'n gront dhis.’ 23Hag ev a'n tos dhedhi, ‘Pypynag oll a wovynni orthiv my a'n gront dhis, bys yn hanter ow gwlaskor.’ 24Ha hi eth yn-mes ha leverel dh'y mamm, ‘Pandr'a wrav orto govynn?’ Ha hi a leveris, ‘Penn Yowann an besydhyer.’ 25Ha desempis hi a dheuth a-bervedh toeth da dhe'n myghtern ha govynn, ow leverel, ‘My a vynn ty dhe ri dhymm dison war dallyour penn Yowann Baptyst.’ 26Ha grevys fest o an myghtern; byttegyns drefenn y li, ha rag an re o esedhys ganso, ny vynna hy skonya. 27Ha desempis an myghtern a dhannvonas dibenner, hag a worhemmynnis may fe dres y benn: ha henna eth ha'y dhibenna y'n prison, 28hag a dhros y benn war dallyour, ha'y ri dhe'n voren ha'n voren a'n ros dh'y mamm. 29Ha'y dhyskyblon, pan glewsons henna, a dheuth ha kemmeres y gorf, ha'y worra yn bedh.

Maga an Pymp Mil

Mat 14:13-21; Luk 9:10-17; Yow 6:1-14

30Ha'n abesteli a omguntellas a-dro dhe Yesu hag a dherivas dhodho pup-tra a wrussens gul ha dyski. 31Hag yn-medh ev dhedha, ‘Dewgh hwi agas honan yn priva bys yn tyller difeyth ha powes pols.’ Rag yth esa lies ow tos hag ow mos, hag i ny's tevo spas rag dybri. 32Hag i a omdennas y'n gorhel bys yn tyller difeyth, yn priva. 33Mes lies a's gwelas owth omdenna, ha's aswonnis, hag i a boenyas a-droes dhiworth pub sita, ha dos ena a-ragdha. 34Ha pan dheuth yn-mes, ev a welas routh veur, ha truedh a'n jeva anedha, rag yth ens avel deves heb bugel; hag ev a dhallathas dyski dhedha lies tra. 35Ha lemmyn pan o an eur seulabrys diwedhes, y dhyskyblon a dheuth dhodho ha leverel, ‘Hemm yw tyller difeyth, ha lemmyn diwedhes yw an eur; 36gwra aga gasa dhe vos, mayth ellons y'n pow hag y'n trevow a-dro, ha prena dhedha aga honan neppyth dhe dhybri.’ 37Mes ev a worthybis ha leverel dhedha, ‘Rewgh hwi dhedha may tepprons.’ Hag yn-medhons dhodho, ‘A wren ni mos dhe brena bara a dhew kans diner, ha ri dhedha dhe dhybri?’ 38Mes yn-medh ev dhedha, ‘Py lies torth eus genowgh? Ewgh dhe weles.’ Ha pan wodhvons, i a leveris ‘Pymp, ha dew bysk.’ 39Hag ev a worhemmynnis may hwrellens gul dhedha esedha oll yn bagasow war an gwyrwels. 40Hag i a esedhas yn renkow, yn kansow hag yn hanter-kansow. 41Ha wosa ev dhe gemmeres an pymp torth ha'n dhew bysk, ev a viras yn-bann dhe nev, ha benniga, ha terri an torthow, ha'ga ri dh'y dhyskyblon dhe worra a-ragdha, ha'n dhew bysk ev a's rannas yntredha oll. 42Hag i a dhybris yn kettep penn, ha lenwys vons. 43Hag i a gemmeras yn-bann dewdhek kanstellas leun a'n brewyon hag a'n puskes. 44Hag yth o an re a dhybris an torthow pymp mil wour.

Kerdhes war an Dowr

Mat 14:22-33; Yow 6:15-21

45Ha hware ev a wrug dh'y dhyskyblon mos a-bervedh y'n gorhel ha mos dhe'n tu arall bys yn Bethsaida, hag ev ow tannvon an routh dhe-ves. 46Ha wosa ev dhe asa farwell dhedha, ev a omdennas dhe'n menydh rag pysi.

47Ha devedhys an gorthugher, yth esa an gorhel yn kres an mor, hag ev y honan war an tir. 48Hag ev a's gwelas tewlys a-dro hag i ow roevya, rag bos an gwyns er aga fynn; hag a-dro dhe beswora goel an nos ev a dheuth dhedha ow kerdhes war an mor, hag a vynnsa tremena dresta. 49Mes pan y'n gwelsons ow kerdhes war an mor, i a dybis y vos tarosvann, hag i a armas; 50rag i a'n gwelas yn kettep onan hag euth esa dhedha. Mes hware ev a gewsis gansa ha leverel dhedha, ‘Gwellhewgh agas cher, my yw; na berthewgh own.’ 51Hag ev eth bys dhedha a-bervedh y'n gorhel; ha'n gwyns a hedhis. Ha marth bras a's teva yntredha aga honan dres musur, ha sowdhenys ens i;6:51 War-lergh re a'n dornskrifow, nyns usi omma an geryow ha sowdhenys ens i. 52rag ny wrussons konvedhes a-dro dhe'n torthow, mes6:52 mes: War-lergh re a'n dornskrifow rag. aga holonn o kaleshes.

Yaghheans an Glevyon yn Gennesaret

Mat 14:34-36

53Ha wosa tremena dhe'n tu arall, i a dheuth dhe'n tir yn Gennesaret, hag ankorya. 54Ha pan esens ow tos yn-mes a'n gorhel, desempis an dus a'n aswonnis. 55I a boenyas a-derdro yn oll an pow na, ha dalleth doen an glevyon a-dro yn gweliow pyle pynag y klewsons y vos ev. 56Ha plepynag yth entra ev, yn trevow, po yn sitys, po yn gwelyow, i a worras an glevyon y'n marghasow, ha'y bysi may tocchyens kyn fe ma's pilenn y vantell; ha kekemmys a's tochyas a veu sawys.