Ken an Arloedh erbynn Ysrael

1Goslowewgh orth an pyth a lever an Arloedh:

Sav yn-bann, pled dha gen a-rag an menydhyow,

ha gas dhe'n breow klewes dha lev.

2Klewyewgh, hwi venydhyow, breus an Arloedh,

ha hwi selyow krev an bys;

rag an Arloedh a'n jeves ken erbynn y bobel

ha strivya a wra gans Ysrael.

3‘Ow fobel vy, pandr'a wrug evy orthis?

Ha fatell y'th skwithis? Gorthyp dhymm!

4Pan y'th tres yn-mes a bow Ejyp,

ha'th tasprena a ji an gethneth,

ha dannvon a-dheragos Moyses,

Aron ha Miryam.

5Ow fobel vy, porth kov a'n pyth a gusulyas Balak myghtern Moab,

hag a'n pyth a worthybis dhodho Balaam mab Beor,

hag a'n pyth a hwarva dhiworth Shittim bys Gilgal,

rag mayth aswonni gweythresow gwiryon an Arloedh.’

An Pyth a Wra an Arloedh y Wovynn

6‘Gans pyth a dhov a-dherag an Arloedh,

hag omblegya a-rag Duw a-vann?

A dhov a-ragdho gans offrynnow leskys,

gans leughi unn bloedh?

7A vydh an Arloedh pes da a vil hordh,

gans degow a vilyow a avonyow oyl?

A rov vy ow hynsa genys rag ow hammweyth,

frut ow horf rag peghes ow enev?’

8Ev re dhiskwedhas dhis, a dhen,

an pyth yw mas:

ha pandr'a wovynn orthis an Arloedh

marnas ty a wra gwirvreus, ha kara tregeredh,

ha kerdhes yn uvel gans dha Dhuw?

Falsuri ha Garowder dhe vos Kessydhys

9Lev an Arloedh a arm war an sita,

ha doethter yw perthi own a'th hanow:

Goslowewgh an welenn ha neb a's ordenas!6:9 Goslowewgh an welenn ha neb a's ordenas: Po amendyans Goslowewgh, A loeth, ha konsel an sita.

10Eus hwath tresoryow drogober yn chi an debeles,

ha'n efa berr-vusurys milliges?

11A reknav ewn an mantolyow kamm

ha'n sagh a fals poesow?

12Tus rych an sita yw leun a freudh;

hag yma hy thrigoryon ow kowleverel,

ha'ga thaves yw fekyl yn aga ganow.

13Rakhenna re dhallethis dha weskel,

orth dha wul ynyal drefenn dha beghosow.

14Ty a wra dybri, mes ny' fydh dha walgh,

hag y fydh nown dhis y'th kolodhyon;

ty a wra kuntell mes heb gwitha saw,

ha'n pyth a withydh a rov dhe'n kledha.

15Ty a wra hasa mes ny vysydh;

ty a wra trettya olivennow, mes ny omuntydh gans oyl;

ty a wra trettya grappys, mes ny evydh gwin.

16Ordenansow Omri yw gwithys,

hag oberow oll chi Ahab,

ha hwi a gerdh herwydh aga husul.

Rakhenna my a'th wra avel euth,

ha'y thrigoryon a vydh hwibana,

ha hwi a berth mewl ow fobel!