Dhe vester an keur. Salm a Davydh.

1Na daw, A Dhuw ow gologhas,

2rag ganow an tebelwas ha'n ganow a falsuri yw igor er ow fynn;

i re gewsis er ow fynn gans fals taves;

3i a omsettyas a-dro dhymm ynwedh gans geryow kas,

hag omladh er ow fynn heb ken.

4Yn attal a'm kerensa i a sev er ow fynn,

mes my a omre dhe bysadow.

5I re dylis dhymm dregynn rag da,

ha kas rag kerensa.

6Gorr tebelwas dhe vos router warnodho,

ha seves kuhudhor orth y leuv dhyghow.

7Pan y'n breusir, des ev yn-mes kablus,

ha bedhes y bysadow treylys dhe begh.

8Bedhes y dhydhyow boghes,

ha kemmeres ken onan y soedh.

9Bedhes y fleghes omdhivasow,

ha'y wreg gwedhwes.

10Bedhes y fleghes gwandrysi ha beggyers;

hwilens i alusen ynwedh pell dhiworth aga annedhow shyndys.

11Dalghennes an okerer pup-tra eus ganso,

ha pylles estrenyon askorr y lavur.

12Na vedhes neb a ystynno tregeredh dhodho,

ha na vedhes neb a gemmerro truedh a'y fleghes omdhivas.

13Bedhes y linyeth diwreydhys,

ha bedhes y hanow defendys dhe-ves y'n henedh a siw.

14Bedhes kovadh kammweyth y dasow a-dherag an Arloedh,

ha na vedhes pegh y vamm defendys dhe-ves.

15Bedhens i prest a-dherag an Arloedh,

rag may torro dhe-ves aga hovadh dhiworth an norvys;

16Drefenn na borthas kov a wul tregeredh,

mes ev a helghyas an den truan ha'n boghosek

rag may lattha an re trogh aga holonn.

17Ev a garas molleth, ha hi a dheu dhodho;

ny vynnas bennath, ha pell yw hi dhiworto.

18Ev a omwiskas gans molleth kepar ha gans kweth;

sygeres hi yn y golodhyon avel dowr,

hag avel oyl yn y eskern.

19Bedhes hi kepar ha'n gwisk mayth omwisk ynno,

ha kepar ha'n grogys a wisk a-dro dhodho pup-prys.

20Hemm yw gober ow huhudhoryon dhiworth an Arloedh,

ha'n re a gews erbynn ow enev.

21Mes gwra dhymm, A Arloedh Duw,

herwydh dha hanow;

drefenn bos dha dregeredh da, gwra ow delivra.

22Rag truan ha boghosek ov vy,

ha'm kolonn yw goliys a-bervedh ynnov.

23Yth av dhe-ves avel skeus pan hirha;

y'm shakir dhe-ves avel an lokust.

24Ow dewlin a wannha gans penys,

ha'm kig a fyll a fowt blonek.

25My a dheuth ha bos skorn dhedha;

pan y'm gwelsons, i a shakyas aga fenn.

26Gweres dhymm, A Arloedh ow Duw;

salw vy herwydh dha dregeredh;

27may hwodhvons bos hemma dha leuv jy,

hag y feu ty, A Arloedh, a'n gwrug.

28Mollethens i, mes ty bennik;

pan sevons, perthens i meth; mes lowenhes dha was.

29Bedhes ow huhudhoryon gwiskys yn disenor,

ha gwiskens i aga meth avel mantell.

30My a ras dhe'n Arloedh yn feur gans ow ganow,

ha my a'n gormel yn mysk an routh.

31Rag ev a sev orth leuv dhyghow an boghosek,

dh'y sawya a'n re a helgh y enev.