Salm a Asaf.

1Duw an duwow, an Arloedh,

re gewsis, ha gelwel an nor

dhiworth drehevel an howl bys dh'y sedhes.

2Yn-mes a Sion, perfydh hy thekter,

Duw re splannas.

3Agan Duw a dheu, heb tewel,

tan a dheber a-dheragdho,

hag annawel veur a vydh a-dro dhodho.

4Ev a elow war an nevow a-vann

ha war an nor, may freusso y bobel.

5Kuntellewgh ow syns war-barth dhymmo vy,

an re a wrug kevambos genev dre sakrifis.

6Ha'n nevow a dheriv y ewnder,

rag Duw y honan yw Breusyas. Sela.

7Klew, ow fobel, ha my a gews,

ha my a dheg dustuni er dha bynn, A Ysrael;

my yw Duw, dha Dhuw jy.

8Ny'th keredhav drefenn dha offrynnow,

ha prest a-dheragov yma dha offrynnow leskys.

9Ny gemmerav lodhen yn-mes a'th chi,

na boghes yn-mes a'th korlannow.

10Rag dhymmo vy yma pub best a'n koes,

an chatel war vil venydh.

11My a aswonn oll ydhyn an menydhyow,

ha dhymmo vy yma bestes an gwelyow.

12Mar porthen vy nown, ny lavarsen dhis,

rag dhymmo vy yma oll an nor ha pup-tra eus ynno.

13A dhebrav vy kig terewi,

po eva goes gever?

14Offrynn grasyans dhe Dhuw,

ha kollanw dha ambosow dhe'n Ughella.

15Ha galw warnav yn dydh anken;

my a'th telirv, ha ty a wra ow gordhya.

16Mes dhe'n tebelwas Duw a lever:

‘Pandr'a vern, ty dhe dherivas ow ordenansow,

po ty dhe gemmeres ow hevambos yn dha anow?

17Rag ty a gas dyskybleth,

ha tewlel ow lavarow war dha lergh.

18Pan welsys lader, ty a assentyas ganso,

ha'th rann a veu gans an avoutroryon.

19‘Ty a ros dha anow dhe sherewneth,

ha'th taves a dhevis toell.

20Ty a esedh ha kewsel erbynn dha vroder;

ty a guhudh mab dha vamm.

21An taklow ma re wrussys, ha tewel a wrugavy;

ty a brederis my dhe vos avelos jy.

Mes my a'th keredh, ha dri kuhudhans er dha bynn.

22‘Prederewgh hemma, hwi neb a ankev Duw,

ma na wrylliv agas skwardya, ha na vo nagonan dhe dhelivra.

23Neb a offrynn an sakrifis a rasyans a wra ow gordhya;

ha dhe neb a wra y fordh yn ewn

my a dhiskwa selwyans Duw.’