Dhe vester an keur. Salm a Davydh. Kan.

1Seves Duw, bedhes y eskerens skattrys;

ha fies dhe'n fo a-dheragdho an re a'n kas.

2Dell yw mog pellhes, yndella gwra aga fellhe i;

ha dell deudh koer a-dherag an tan,

yndella es an debeles dhe goll a-dherag Duw.

3Mes lowenhes an re wiryon;

bedhens heudhik a-dherag Duw;

ha bedhens leun a joy.

4Kenewgh dhe Dhuw, kenewgh gormola dh'y hanow ev;

drehevewgh kan68:4 drehevewgh kan: Amendys war-lergh an Syriek ha'n Targum dhe neb a varghok war an nevow;

an Arloedh yw y hanow;

bedhewgh heudhik a-dheragdho.

5Tas dhe'n omdhivasow, ha breusyas an gwedhwesow,

yndella yw Duw yn y drigva sans.

6Duw a worr an re dhigoweth yn teyluyow;

ev a dhre an prisnoryon yn-mes dhe sewena,

mes an re worth a drig yn tir kras.

7A Dhuw, pan ythys yn-mes a-dherag dha bobel,

pan gerdhsys der an difeyth, Sela

8an nor a grenas, an nevow ynwedh a dheveras

a-dherag Duw;

ha Sinay y honan a dhegrenas a-dherag Duw, Duw Ysrael.

9Ty, A Dhuw, a wrug glaw hel dhe goedha;

ty a gennerthas dha ertach pan o skwith.

10Dha bobel a drigas ena;

ty, A Dhuw, a brovias y'th tader rag an den boghosek.

11An Arloedh a ros an ger;

bagas meur a dhellos an derivas:

12‘Myghternedh a luyow a fias dhe'n fo!’

An venyn esa ow kortos yn tre a rannas an preydh.

13Kyn hwrowedhsowgh yn mysk an korlannow,

yth owgh avel eskelli kolomm kudhys gans arghans,

ha'y fluv gans owr melyn.

14Pan skattras an Ollgalloesek68:14 an Ollgalloesek: Ebrow Shadday. myghternedh ynni,

gwynn o hi avel an ergh yn Salmon.

15Menydh Duw yw avel menydh Bashan,

menydh ughel yw menydh Bashan.

16Prag y lemmowgh, hwi venydhyow ughel?

Hemm yw an menydh may fynn Duw triga ynno;

yn tevri, an Arloedh a drig ynno bynitha.

17Charettow Duw yw ugens mil,

ha milyow a vilyow;

yma an Arloedh yn aga mysk, avel yn Sinay, y'n sentri.

18Ty re yskynnas y'n ughelder,

ty re hembronkas prisnoryon,

ty re dhegemmeras rohow yn mysk tus,

hag yn mysk an re worth, rag may trykko an Arloedh Duw ena.

19Benniges re bo an Arloedh,

neb a berth agan begh pub dydh;

ev yw Duw agan selwyans. Sela.

20Agan Duw ni yw Duw a selwyans;

ha der an Arloedh Duw yma diank rag ankow.

21Mes Duw a vrew penn y eskerens,

klopenn blewek an den a bes hwath yn y gammweyth.

22An Arloedh a leveris,

‘My a dhre arta dhiworth Bashan,

my a dhre ow fobel arta dhiworth downderyow an mor,

23rag may trogghi dha droes yn goes,

rag may kaffo taves dha geun y rann a'th eskerens.’

24I re welas dha geskerdh, A Dhuw,

keskerdh ow Duw, ow Myghtern, y'n sentri.

25An ganoryon eth a-rag, an menestrouthi gans daffar kerdyn eth a-dryv,

yn aga mysk yth esa morenyon ow tonsya gans tabouryow.

26Bennigewgh Duw y'n kuntellesow,

ha'n Arloedh, hwi fenten Ysrael.

27Ottena Benyamin byghan, aga rewler,

pennternedh Yuda ha'ga routh,

pennternedh Zebulun ha pennternedh Naftali.

28Dha Dhuw re worhemmynnis dha nerth;

surha, A Dhuw, an pyth re wrussys ragon ni.

29A-barth dha dempel yn Yerusalem

myghternedh a dhre rohow dhiso jy.

30Keredh goedhvil an kors,

gre an terewi, gans leughi an poblow

a stankyas yn-dann dreys an temmyn a arghans;

skatter an poblow a lowenha yn bresel.

31Pennsevigyon a dheu yn-mes a Ejyp;

Ethiopia a fysk dhe ystynn hy diwleuv dhe Dhuw.

32Kenewgh dhe Dhuw, hwi wlaskordhow an nor;

kenewgh gormola dhe'n Arloedh; Sela

33dhe neb a varghok war an nevow, an nevow koth;

otta, ev a dhyllo y lev, ha henn yw lev galloesek.

34Askrifewgh nerth dhe Dhuw;

yma y veuredh war Ysrael,

hag yma y nerth y'n ebron.

35A Dhuw, euthyk osta y'th tylleryow sans,

Duw Ysrael;

neb a re nerth ha galloes dh'y bobel.

Benniges re bo Duw.