Salm Solomon.

1A Dhuw, ro dha vreusow dhe'n myghtern,

ha'th ewnder dhe vab an myghtern.

2Re vreusso ev dha bobel gans ewnder,

ha'th voghosogyon gans gwirvreus.

3Re dhrollo an menydhyow kres dhe'n bobel,

ha'n brennow dri ewnder.

4Re vreusso ev an voghosogyon yn mysk an bobel,

ha sawya mebyon an den edhommek,

ha brewi an den a'm gwask.

5Re borthons own ahanas hedre vo an howl,

ha hedre vo an loer, a unn henedh dhe'n nessa.

6Re dhiyskynno avel glaw war an gwels goera,

avel kowasow a dhowrha an dor.

7Re vleujyowo gwiryonedh yn y dhydhyow,

ha palster kres, erna hettho an loer.

8Re'n jeffo maystri a vor dhe vor,

ha dhiworth an avon bys yn pennow an norvys.

9Re omblekko a-dheragdho an re usi trigys y'n difeyth;

ha'y eskerens lapya an doust.

10Re dhrollo myghternedh Tarshish ha'n ynysow trubyt;

ha myghternedh Sheba ha Seba dri rohow.

11Re omblekko myghternedh oll a-dheragdho;

hag oll an kenedhlow bos y sojets.

12Rag ev a dhelirv an edhommek pan gri rag gweres,

ha'n boghosek ma nag eus dhodho gwereser.

13Ev a gemmer truedh a'n den gwann ha'n den edhommek,

hag ev a selow enevow an edhommogyon.

14Ev a bren aga enev dhiworth arwask ha garowder,

ha drudh vydh aga goes yn y wolok ev.

15Re vewo,

ha dhodho re bo res owr dhiworth Sheba;

re byssons ragdho heb hedhi,

ha'y venniga oll an jydh.

16Re bo kals ys y'n tir

ow tegrena war benn an menydhyow;

re bo y frut avel Lebanon,

ha re sewenno tus an sita

avel gwels an dor.

17Re dhurryo y hanow bys vykken;

re bo y hanow fastys hedre vo an howl.

Ena tus a omvennik dredho;

an kenedhlow oll a'n gelow gwynnvys.

18Benniges re bo an Arloedh Duw, Duw Ysrael,

neb y honan a wra marthusyon;

19Ha benniges re bo y hanow gloryus bynitha,

hag oll an nor a vydh lenwys a'y wolewder.

Amen hag Amen.

20Pysadow Davydh mab Yesse yw diwedhys.