Kan. Salm a Asaf.

1Na daw, A Dhuw,

na omdenn, ha na bowes, A Dhuw.

2Rag otta, dha eskerens a wra tros;

ha'n re a'th kas re dhrehevis aga fenn.

3I a dewlis towlow fel erbynn dha bobel,

hag omgusulya erbynn dha dus tresorys.

4I re leveris, ‘Dewgh, ha'ga hisya, ma na vons kenedhel,

ha ma na vo hanow Ysrael yn kovadh namoy.’

5Rag i re omgusulyas keskolonn;

i re wrug kevambos er dha bynn;

6Tyldow Edom ha'n Yshmaelysi,

Moab ha'n Hagrysi;

7Gebal, hag Ammon, hag Amalek,

Filistia ha'n re usi trigys yn Tyr.

8Asshur ynwedh re junyas gansa;

i re weresas dhe vebyon Lot. Sela.

9Gwra dhedha i dell wrussys dhe Midyan,

dhe Sisera ha dhe Yabin orth nans Kishon;

10neb a verwis yn Endor,

ha dos ha bos avel teyl rag an dor.

11Gwra aga bryntinyon avel Oreb ha Zeeb,

oll aga fennsevigyon avel Zebagh ha Salmunna;

12Neb a leveris, ‘Kemmeryn ni yn agan perghennogeth

peurvaow Duw.’

13A Dhuw, gwra i avel has askall,

avel kulyn a-rag an gwyns.

14Kepar ha tan a lesk an koes,

ha kepar ha flamm a worr tan y'n menydhyow,

15yn kettella helgh i gans dha annawel

ha browegh i gans dha dewedh.

16Lanw aga fasow a dhisenor,

may hwillons dha hanow, A Arloedh.

17Perthens i meth ha bedhens dyegrys bys vykken;

bedhens i disenorys, ha mos dhe goll.

18Ena i a wodhvydh

ty dha honan neb yw dha hanow an Arloedh

dhe vos an Ughella dres oll an nor.