1An Arloedh a reyn, lowenhes an nor;

bedhes heudhik ynysow pals.

2Yma kommol ha tewlder a-dro dhodho;

ewnder ha gwirvreus yw sel y se.

3Tan a gerdh a-dheragdho,

ha leski y eskerens a-derdro.

4Y lughes a wolowis an norvys;

an nor a'n gwelas, ha krena.

5An menydhyow a deudhis avel koer a-dherag an Arloedh,

a-dherag Arloedh oll an nor.

6An nevow a dheriv y ewnder,

hag oll an poblow re welas y wolewder.

7Perthes meth oll an re a serv imajys gravys,

hag a vost yn idolys;

gordhyewgh ev, an duwow oll.

8Sion a glewas hag a lowenha,

ha heudhik o myrghes Yuda,

drefenn dha vreusow, A Arloedh.

9Rag ty, A Arloedh, yw ughel dres oll an nor;

ty yw ughelhes yn feur a-ugh an duwow oll.

10Hwi neb a gar an Arloedh, kesewgh drog;

ev a with enevow y syns;

ev a's delirv dhiworth dorn an debeles.

11Golow a dardh rag an re wiryon,

ha lowena rag an re ewnhynsek aga holonn.

12Lowenhewgh y'n Arloedh, hwi an re wiryon,

ha grassewgh dhodho ow kovhe y sansoleth.