Gwirvreus a Dhuw

1Ytho ny'th eus askus, A dhen, piwpynag a vi, ow preusi den arall; rag pan vreusydh den arall y preusydh er dha bynn dha honan rag ty, an breusyas, a wra an keth taklow dha honan. 2Ni a woer breus Duw dhe goedha yn hwir war an re a wra taklow a'n par na. 3A dybydh, A dhen, y skeusydh a vreus Duw pan vreusydh an re a wra taklow a'n par na ha ty dha honan orth aga gul? 4Po dispresya a wredh jy rychys y guvder ha'y wodhevyans ha'y berthyans? A ny wodhes jy kuvder Duw dhe'th hembronk dhe edrek? 5Mes dre dha golonn gales hag anedrek yth esos ow kreuni konnar ragos dha honan y'n jydh a gonnar may fo diskwedhys ynno breus gwiryon Duw. 6Rag yth attal dhe bub den herwydh y oberow: 7dhe'n re a hwila, dre berthyans ow kul da, gordhyans hag enor hag anvarwoleth, y fynn ev ri bewnans heb diwedh. 8Mes rag an re neb der avi yw diwostydh dhe'n gwiryonedh, mes dhe'n droktra gostydh y fydh konnar ha sorr bras. 9Galar hag ahwer a'n jevydh pub enev den a wra drog, an Yedhow yn kynsa ha'n Grek ynwedh, 10mes gordhyans hag enor ha kres rag pub huni a wra da, an Yedhow yn kynsa ha'n Grek ynwedh. 11Rag nyns eus faverans gans Duw.

12Pub huni re beghas yn-mes a'n lagha a verow yn-mes a'n lagha, ha pub huni re beghas yn-dann an lagha a vydh breusys yn-dann an lagha. 13Rag nyns yw goslowysi an lagha hag yw justifiys a-rag Duw, mes gwrioryon an lagha hag a vydh prevys ewn. 14An kenedhlow na's teves an lagha, pan wrons dre natur an pyth yw erghys gans an lagha, lagha yns i dhedha aga honan, kyn na's teves an lagha. 15I a dhiskwa bos skrifys war aga holonn an pyth yw erghys gans an lagha, ha'ga howses ynwedh a dheg dustuni ha'ga thybyans a's kuhudh a-bervedh ynna po martesen a's askus 16y'n jydh may freus Duw, war-lergh ow aweyl, kevrinyow tus dre Yesu Krist.

An Yedhewon ha'n Lagha

17Mes mara'th henwir Yedhow ha fydhya a wredh y'n lagha ha bostya yn Duw 18ha godhvos y vodh ha synsi bos plegadow an pyth yw gwell drefenn ty dhe vos dyskys y'n lagha, 19ha mars os sur ty dhe vos hembrenkyas dhe'n dhellyon, golow dhe'n re usi y'n tewlder, 20kesker dhe'n fellyon, dyskador fleghes, ow kavoes y'n lagha an leun studh a wodhvos hag a wiryonedh – 21ty ytho hag a dhysk ken re, a ny vynnydh omdhyski? Ha ty ow pregoth erbynn ladra, a ledrydh? 22Ty hag a lever na wreller avoutri, a wredh jy avoutri? Ty hag a gas imajys, a ledrydh templow? 23Ty hag a vost y'n lagha, a wredh jy disenor dhe Dhuw dre derri an lagha? 24Rag dell yw skrifys, ‘Hanow Duw yw disenorys yn mysk an kenedhlow dredhos.’

25An trodreghyans yw dhe les yn tiogel mars os gostydh dhe'n lagha; mes mar terrydh an lagha, dha drodreghyans yw gyllys dhe antrodreghyans. 26Ytho, mar syns den yw heb trodreghyans ordenansow an lagha, a ny vydh y antrodreghyans reknys avel trodreghyans? 27Ytho an den na'n jeves an trodreghyans yn y gorf mes a syns an lagha a'th kuhudh, ty hag a'th eus skrif an lagha ha'n trodreghyans mes a derr an lagha.

28Rag nyns yw ev gwir Yedhow neb yw onan war-ves, na nyns yw gwir drodreghyans neppyth war-ves hag y'n kig. 29Mes ev yw gwir Yedhow neb yw onan war-ji, ha trodreghyans yw a'n golonn, yn spyrys heb bos yn lytherenn, ma nag yw y wormola dhiworth tus mes dhiworth Duw.