Kusul a-dro dhe Gowethyans

1Piwpynag a docchyo pyg a vydh defolys,

ha piwpynag a gowetthyo gans den goethus a vydh kepar hag ev.

2Na dhrehav poes yw dres dha nerth,

na kowethya gans den yw moy galloesek ha moy rych agesos.

Fatell yll pott a bri kowethya gans kalter a horn?

An pott a wysk warnedhi, hag ev y honan a vydh terrys.

3Den rych a wra droktra, ha keworra bostyans;

den boghosek a wodhev drokoleth, ha res yw dhodho keworra diharesow.

4Mar kyllydh bos dhe les dhodho, den rych a wra devnydh ahanas,

mes mars eus edhommow dhis, ev a'th forsak.

5Mars eus pythow dhis, ev a drig genes;

ev a byll pup-tra eus genes, heb grev.

6Pan eus edhomm dhodho ahanas, ev a'th toell,

ha minhwerthin warnas ha ri dhis govenek;

ev a gews dhis yn teg ha leverel, ‘Pyth yw res dhis?’

7Ev a'th sham der y voes ev,

bys pan y'th wakha diwweyth po teyrgweyth,

ha gordhiwedh ev a wra ges ahanas.

Mara'th wel a-wosa, ev a'th forsak

ha shakya y benn orthis.

8Kemmer with na vydhydh ledys yn sowdhan,

na iselhes y'th follneth.

9Pan wra den kevoethek dha elwel, bydh lent ow korthybi,

hag ev a'th helow moy menowgh.

10Na dheus re ogas, ma na vi skonys;

ha na sev re bell, ma na vi ankevys.

11Na hwila kewsel ganso kepar ha'th par,

ha na drest yn y eryow pals;

rag ev a'th prev dre gows hir,

hag ev a'th hwither yn unn vinhwerthin.

12Fell yw an den na with dha gevrinyow;

ny spar dha bystiga na'th prisonya.

13Omwith, ha bydh pur war,

rag yth esos ow kerdhes a-dro yn peryll a goedha.

14Pan glewydh an taklow ma y'th kosk, difun!

Kar an Arloedh der oll dha vewnans,

ha gelwel warnodho rag dha selwyans.13:14 Nyns usi gwers 14 kevys yn brassa rann an dornskrifow.

15Pub kreatur a gar y hevelep,

ha pubonan y gentrevek;

16Pub kreatur a geskoweth herwydh y eghenn,

ha gour a len orth y hevelep.

17Pana gowethyans eus yntra bleydh hag oen?

Yndella yth yw yntra peghador ha den duwek.

18Pana gres eus ynter usvil ha ki?

Ha pana gres yntra den rych ha den boghosek?

19Asenes y'n gwylvos yw preydh lewyon;

yn kepar maner an voghosogyon yw peurva rag an dus rych.

20Uvelder yw pyth kasadow dhe'n den goethus;

yn kepar maner den boghosek yw pyth kasadow dhe dhen rych.

21Pan drebuch den rych, skoedhys yw gans y gowetha;

mes pan goedh den isel, y gowetha a'n herdh dhe-ves.

22Pan drebuch den rych, yma dhodho lies gwereser;

mar kews geryow anwiw, i a'n askus.

Mar trebuch den uvel, i a'n keredh;

mar kews doethter, ny woslowir orto.

23Pan gews den rych, peub a dew,

hag i a wormel y eryow dhe'n kommol.

Pan gews an boghosek, i a lever, ‘Piw yw hemma?’

Ha mar trebuch, i a'n domhwel hwath moy.

24Da yw rychys dhe neb yw heb pegh,

ha boghosogneth yw drog yn breus an re dhidhuw.

25Kolonn den a janj y fisment,

po rag dader po rag droktra.

26Fisment jolif yw tokyn a golonn lowen,

mes rag devisya parabolennow yma edhomm a breder skwithus.