1A beghsys, ow mab? Na wra na fella,

mes pys dehwelyans a'th peghosow kyns.

2Fi a beghes avel dhiworth golok sarf;

rag mar teudh nes dhe beghes, ev a'th vrath.

Y dhyns yw dyns lew,

ow tistrui bewnans tus.

3Pub gweythres anlaghel yw avel kledha dewvinyek;

nyns eus yaghheans dhe'n goli a wra.

4Skruth ha tonteth a dhifeyth golusogneth;

yndella y fydh chi an den balgh difeythys.

5Pysadow a anow an boghosek a dheu bys yn diwskovarn Duw,

ha'y vreus a dheu yn uskis.

6Neb a gar keredh a gerdh yn olow an peghador,

mes neb a berth own a'n Arloedh a goedh yn edrek yn y golonn.

7Neb yw krev yn kows yw aswonnys a bell;

mes pan slynk, den a gonvedhes a woer henna.

8Piwpynag a dhrehaffo y ji gans arghans tus erell

yw haval dhe neb a guntell meyn rag karn y vedh.

9Kuntelles an debeles yw haval dhe busorn a arrow lin,

ha'ga diwedh yw tan ow flammya.

10Fordh an beghadoryon yw levenhes gans meyn,

mes y dhiwedh yw pytt ifarn.

Furneth ha Follneth

11Neb a with an lagha yw mester a'y brederow,

ha keweras own an Arloedh yw furneth.

12Neb nag yw konnyk ny yll bos dyskys,

mes yma sleyghneth a ynkress hwerowder.

13Skentoleth an den fur a ynkress avel liv,

ha'y gusul yw avel fenten a vewnans.

14Brys an foll yw avel seth terrys;

ny yll synsi skentoleth.

15Mar klew den poellek lavar fur,

ev a'n gormel ha keworra dhodho;

pan y'n klew den a vew yn plesour, ev a hwerth orto

ha'y dewlel a-dryv y geyn.

16Klapp an foll yw haval dhe vegh war vyaj,

mes gras yw kevys yn kows an poellek.

17Lavar den doeth a vydh hwilys y'n kuntelles,

hag i a ombreder a-dro dh'y eryow yn aga brys.

18Avel chi diswrys yw furneth dhe foll,

ha skentoleth an den diskians, yw kows heb styr.

19Dhe'n den diboell, adhyskans yw sprallow a-dro dh'y dhewdroes,

hag avel kargharow war y leuv dhyghow.

20Foll a dhrehav y lev pan hwerth,

mes an den fur a vinhwerth yn kosel.

21Dhe'n den poellek adhyskans yw haval dhe degenn owrek,

hag avel breghellik war y vregh dhyghow.

22Troes an foll a fisten yn chi,

mes den gans prevyans meur a'n jeves meth a wul henna.

23Den diboell a aspi yn chi a-dhiworth an daras,

mes gour dyskys a worta yn-mes.

24Chorlek yw, den dhe woslowes orth daras,

mes den doeth a via duwenys der an disenor.

25Gweusyow klappyoryon a gews a'n pyth nag yw aga bern,

mes geryow an re dhoeth yw poesys y'n vantol.

26Fellyon a gews kyns prederi,

mes an re fur a breder kyns kewsel.

27Den didhuw pan villik Satnas,

ev a villik y enev y honan.

28Hwystrer a villik y enev y honan,

hag yw kasadow yn y gentreveth.