1Rag i a leveris dhedha aga honan, ow resna yn kamm,

‘Berr ha trist yw agan bewnans,

ha nyns eus remedi yn diwedh den,

na nyns eus denvyth aswonnys neb a dhehwelis dhiworth ifarn.

2Rag ni a veu genys dre jons,

ha wosa hemma ni a vydh kepar dell na vien bythkweth;

rag an anall yn agan dewfrik yw avel mog,

ha reson yw avel gwryghonenn yn gwayans agan kolonn;

3ha pan yw difeudhys, an korf a dreyl dhe lusu,

ha'n spyrys a deudh dhe-ves avel ayr medhel.

4Agan hanow a vydh ankevys wosa termyn,

ha ny berth denvyth kov a'gan oberow;

agan bewnans a dremen dhe-ves kepar hag olow kommolenn,

hag a vydh skattrys avel niwl

yw chasys dhe-ves dre dhewynnow an howl

ha fethys gans y doemmder.

5Rag agan termyn yw avel skeus hag a dremen dhe-ves,

ha nyns eus dehwelyans vyth dhiworth agan diwedh,

drefenn y vos selys fast ma na dheu denvyth arta.

6‘Dewgh, rakhenna, gwren ni tastya gans plesour an taklow da usi omma,

ha gul devnydh leun a'n gwrians kepar hag yn yowynkneth.

7Lenwyn agan honan a win kostek ha melyseth,

ha na as bleujenn vyth a'n gwenton dhe dremena dreson.

8Kurunyn agan honan gans bleujennow ros kyns i dhe wedhra.

9Na vedhes denvyth ahanan heb y rann yn agan goelyow balgh;

gesyn toknys a'gan heudhder yn pub tyller,

drefenn bos hemma agan rann, ha'gan kevrenn yw hemma.

10Arweskyn an den gwiryon boghosek;

na sparyn an wedhwes,

na gul vri a vlew loes an henavek.

11Mes bedhes agan nerth lagha ewnder,

rag an pyth yw gwann a brev y honan dhe vos diles.

12‘Kontrewaytyn an den gwiryon,

drefenn ev dhe vos ankombrynsi dhyn

hag ev a omsett orth agan gwriansow;

ev a'gan keredh a beghosow erbynn an lagha,

ha'gan kuhudha a beghosow erbynn agan dyskans.

13Ev a lever bos dhodho godhvos a Dhuw,

ha gelwel y honan flogh an Arloedh.

14Ev eth ha bos dhyn keredh a'gan tybyansow;

15an wel anodho yw begh dhyn,

drefenn nag yw y vewnans kepar ha tus erell,

ha koynt yw y fordhow.

16Akontys on ni ganso avel bathow fug,

hag ev a omwith dhiworth agan fordhow avel dhiworth taklow avlan;

ev a lever diwettha penn an re wiryon dhe vos gwynnvys,

ha bostya bos Duw y das.

17Gwelyn mars yw y eryow gwir,

ha prevyn pyth a hwer orth penn y vewnans;

18rag mars yw an den gwiryon mab Duw,

ev a'n gweres, ha'y dhelivra dhiworth leuv y eskerens.

19Prevyn ev gans despit ha torment,

may hwodhvyn y jentylys,

ha gul prov a'y berthyans.

20Dampnyn ev dhe vernans methus,

rag war-lergh an pyth a lever, ev a'n jevydh difresyas.’

Kammdybyans an Debeles

21Yndella i a resnas, mes i a veu ledys yn sowdhan,

rag aga sherewynsi a's dallas,

22ha ny's teva godhvos a gevrinyow Duw,

na govenek kavoes gobrow sansoleth,

na ny dhissernsons an pewas rag enevow divlam;

23rag Duw a wrug den rag anpodredhes,

ha'y wul yn imaj y vythkwethekter y honan;

24mes dre avi an jowl ankow a entras y'n norvys,

ha'n re yw a'y berghennogeth a gyv prevyans a vernans.