1Igor dha dharasow, a Lebanon,

rag may tevorryo tan dha gederwydh!

2Oul, a verywenn, rag an gederwydhenn re goedhas;

gwydh bryntin re beu gwastys!

Oulyewgh, derwennow Bashan;

an koes tew re beu treghys dhe'n dor!

3Yma son oulyans an vugeledh,

a-ban veu shyndys aga splannder.

Yma son bedhygla an lewyon yowynk,

rag bos shyndys meuredh11:3 meuredh: Po prysk-koes. an Yordan.

An Dhew Vugel

4Yndellma y lever an Arloedh ow Duw: Pesk an flokk rag an ladhva. 5Aga frenoryon a wra aga ladha ha nyns yns i kablus. An re a wra aga gwertha a lever, ‘Benniges re bo an Arloedh, rych ov vy!’ Aga bugeledh ny gemmerons truedh anedha. 6Ytho ny gemmerav vy truedh namoy a'n re trigys y'n tir, yn-medh an Arloedh. Otta, yth esov ow ri pubonan yn leuv y gentrevek hag yn leuv y vyghtern. I a wra brewi an tir, ha ny wrav vy aga sawya dhiworth aga leuv.

7Ytho my a beskis an flokk rag an ladhva, ynwedh boghosogyon an flokk.11:7 ynwedh boghosogyon an flokk: Ebrow rakhenna boghosogyon an flokk. My a gemmeras diw vagel ha my a henwis an eyl Hwekter ha'y ben Kolmow,11:7 Kolmow: Po Kesunyans. ha my a beskis an flokk. 8My a dhileas an tri bugel yn unn mis. My a gollas perthyans gansa, hag i a wrug ow dispresya. 9Ha my a leveris, ‘Ny vynnav agas peski. An dhavas a vydh ow merwel, gas hi dhe verwel, ha neb a vydh dileys gas hi dhe vos dileys. Ha'n remenant – re dheppro pubonan kig hy ben.’ 10Ena my a gemmeras ow bagel Hwekter ha'y therri, dhe dhilea an kevambos re wrussen gans oll an poblow. 11Ev a veu dileys y'n jydh na, ha boghosogyon an flokk,11:11 boghosogyon an flokk: Po war-lergh an Septuagint marchons an deves. neb esa ow mires orthiv, a wodhva hemma dhe vos ger an Arloedh. 12My a leveris dhedha, ‘Mars yw agas bodh, rewgh vy ow gober; ha mar nyns yw agas bodh, na rewgh.’ Ytho i a boesas ow gober, deg bath warn ugens a arghans. 13Ha'n Arloedh a leveris dhymm, ‘Towl e dhe'n priweythor11:13 dhe'n priweythor: Po war-lergh an Syriek, dhe'n argh. – an pris bryntin may hwrussons ow thalvos!’ Ha my a gemmeras an deg bath warn ugens a arghans ha'ga thewlel y'n chi an Arloedh dhe'n priweythor. 14Ena my a dorras ow nessa bagel, Kolmow, dhe dhilea an brederedh yntra Yuda hag Ysrael.

15Ena an Arloedh a leveris dhymm: Kemmer arta an daffar a vugel foll. 16Awotta my a wra drehevel bugel y'n tir na wra vri a'n re usi ow mos dhe goll, na hwilas an yowynk, na sawya an shyndys; ny sosten an gwann,11:16 an gwann: Po an skwithys, po neb a sev. mes ev a dheber kig an tew, ow tenna hwath aga harnow dhe-ves.

17Go-ev an koeg vugel,

a forsak an flokk!

Re wasko kledha y vregh

ha'y lagas dyghow!

Re gowlwetthro y vregh,

ha re bo y lagas dyghow kowldhellys!