Budhogoleth Yerusalem

1Begh ger an Arloedh12:1 Begh ger an ARLOEDH: Po Dargan: Ger an ARLOEDH. a-dro dhe Ysrael. An Arloedh, neb a les an nevow, ha fondya an nor, ha formya spyrys mab-den a-ji dhodho, a lever: 2Awotta my a wra Yerusalem hanaf a benn-dro rag oll an poblow y'n kyrghynn; ha rag Yuda ynwedh, pan vydh Yerusalem kes a-derdro. 3Y'n jydh na my a wra Yerusalem karrek veghus rag oll an poblow. Myns yw beghys gensi a vydh skwardys yn sevur, pan omguntell oll kenedhlow an norvys er hy fynn. 4Y'n jydh na, yn-medh an Arloedh, my a wra gweskel pub margh gans sowdhan, ha'y varghek gans muskokter. My a iger ow dewlagas orth chi Yuda, mes my a wra gweskel pub mergh a'n kenedhlow gans dellni. 5Ena kordhow Yuda a lever yn aga holonn, ‘Trigoryon Yerusalem yw nerth dhymm, dre Arloedh an luyow aga Duw.’

6Y'n jydh na, my a wra kordhow Yuda avel pott tanek yn mysk prennyer, avel faglenn tan yn mysk manalow. I a wra devorya dhe'n dyghow ha dhe'n kledh oll an poblow y'n kyrghynn, mes Yerusalem a vydh annedhys arta yn hy tyller hi, yn Yerusalem.

7An Arloedh a wra sawya tyldow Yuda wostalleth, rag na vo enor chi Davydh ha trigoryon Yerusalem brassa ages Yuda. 8Y'n jydh na an Arloedh a vydh skoes dhe drigoryon Yerusalem; ev neb yw difredh yn aga mysk an jydh na a vydh avel Davydh, ha chi Davydh a vydh avel Duw, avel el an Arloedh a-ragdha. 9Y'n jydh na my a hwila kowldhistrui oll an kenedhlow a dheu erbynn Yerusalem.

Kyni ragdho Ev Neb a Wansons

10Ha my a wra diveri war ji Davydh ha trigoryon Yerusalem spyrys a ras ha pysadow. I a wra mires warnav vy neb re wansons, ha kyni ragdho avel kynvann rag an unn vab, ha mornya ragdho yn hwerow avel galar rag an kynsa-genys. 11Y'n jydh na an kynvann yn Yerusalem a vydh meur, avel kynvann Hadad-rimmon yn nans Megiddo. 12Ha'n tir a wra kyni, pub teylu orto y honan; teylu chi Davydh orto y honan, ha'ga gwragedh orta aga honan; teylu chi Nathan orto y honan, ha'ga gwragedh orta aga honan; 13teylu chi Levi orto y honan, ha'ga gwragedh orta aga honan; teylu chi Shimei orto y honan, ha'ga gwragedh orta aga honan; 14oll remenant an teyluyow orta aga honan, ha'ga gwragedh orta aga honan.