CAB. XXI

1As ren y Chiarn cooinaghtyn er Sarah, myr v’eh er loayrt, as ren y Chiarn son Sarah, ny v’eh er yialdyn. 2Son ren Sarah giennaghtyn, as gymmyrkey mac da Abraham, ayns e henn eash; corrym rish y traa, myr va Jee er loayrt rish. 3As denmys Abraham yn mac v’er ny ruggey da, Isaac, eh ren Sarah gymmyrkey. 4As ren Abraham e vac Isaac y yiarey-chymmylt er yn hoghtoo laa, myr va Jee er harey eh. 5As va Abraham keead bleïn dy eash, tra va e vac Isaac er ny ruggey da.

6As dooyrt Sarah, Ta Jee er choyrt orrym garaghtee, myr shen dy jean dagh unnane chlinnys jeh, garaghtee mârym. 7As dooyrt ee, Quoi yiarragh rish Abraham, dy beagh Sarah ny ben-kee? son ta mee er n’ymmyrkey mac da ayns e henn eash. 8As daase y lhiannoo, as v’eh er ny harbaa: as ren Abraham cuirraghyn mooarey, yn laa cheddin va Isaac charbaït.

9As honnick Sarah mac Hagar yn Egyptian, gannidys, eh v’ee er n’ymmyrkey da Abraham. 10Shen-y-fa dooyrt ee rish Abraham, Chyndaa magh yn inney-veyl shoh, as e mac: son cha bee mac yn inney-veyl shoh ny eirey marish my vac, eer marish Isaac. 11As va shoh feer trome er aigney Abraham er coontey e vac.

12As dooyrt Jee rish Abraham, Ny gow shoh rouyr gys dty chree, er coontey yn ghuilley, as er coontey dty inney-veyl: ayns dy chooilley nhee ta Sarah er ghra rhyt, jean lurg yn aigney eck: son ayns Isaac vees dty luight er ny enmys. 13As myrgeddin, veih mac yn inney-veyl trog-yms seose ashoon mooar, er-y-fa dy nee dty luight’s eh. 14As dirree Abraham seose feer voghey, as ghow er arran, as boteil dy ushtey, as hug eh ad da Hagar [coyrt ad er e geaylin] as y lhiannoo, as hug eh ee ersooyl: as jimmee ee ro-ee, as hiee er-shaghryn noon as noal ayns faasagh Beer-sheba. 15As va’n ushtey ’sy voteil baarit, as hug ee yn lhiannoo ny lhie fo unnane jeh ny thammagyn. 16As hiee as hoie ee sheese jeeragh er, tammylt mie veih, mysh orraghey sidey: son dooyrt ee, Ny lhig dou fakin baase y lhiannoo. As hoie ee sheese jeeragh er, as hrog ee seose e coraa, as ren ee keayney. 17As cheayll Jee coraa yn ghuilley, as ren ainle Yee geamagh gys Hagar veih niau, as dooyrt eh r’ee, Cre ta jannoo ort, Hagar? ny gow aggle; son ta Jee er chlashtyn coraa yn ghuilley raad t’eh: 18Irree, trog seose y ghuilley, as gow eh er y laue, son neem’s jehsyn ny ashoon pooaral. 19As doshil Jee ny sooillyn eck, as honnick ee chibbyr ushtey: as hiee, as lhieen ee yn boteil lesh ushtey, as hug ee jough da’n ghuilley. 20As va Jee marish y ghuilley, as daase eh, as ren eh baghey ’syn aasagh, as haink eh dy ve ny hideyr. 21As ren eh cummal ayns faasagh Paran: as hooar e voir ben da, veih cheer Egypt.

22As haink eh gy-kione, ec y traa shen, dy ren Abimelech as Phicol, ard-chaptan e heshaght-chaggee, loayrt rish Abraham gra, Ta Jee mayrt ayns ooilley ny t’ou dy yannoo. 23Nish er-y-fa shen, jean breearrey dou ayns shoh liorish Jee, nagh jean oo foalsaght rhym, ny rish my vac, ny rish mac my vac: agh cordail rish y chenjallys ta mee er hoilshaghey dhyt, dy jean uss y lheid cheddin dooys, as da’n cheer ayn t’ou er dty yoarreeaght. 24As dreggyr Abraham, Nee’m breearrey dhyt. 25As ren Abraham plaiynt gys Abimelech mychione y chibbyr-ushtey, va sharvaantyn Abimelech er ghoaill er niart. 26As dreggyr Abimelech, Ta ooilley shoh gyn-yss dooys: chamoo dinsh oo dou, chamoo cheayll mee jeh, derrey’n laa jiu. 27As ghow Abraham kirree as dew, as livrey eh ad da Abimelech: as ren ad conaant ry-cheilley. 28As hug Abraham dy lhiattee shiaght eayin woirryn veih’n chioltane er-lheh. 29As dooyrt Abimelech rish Abraham, Cre hon ta ny shiaght eayin woirryn shoh, t’ou er hoiaghey er-lheh? 30As dreggyr eh, Ny shiaght eayin woirryn shoh gowee oo jeh my laue, dy vod ad ve son feanish dooys dy vel mee er chleiy yn chibbyr shoh. 31Shen-y-fa ren eh yn ynnyd shen y enmys Beer-sheba; er-yn-oyr dy nee ayns shen ren ad breearrey dy cheilley. 32Myr shoh ren ad conaant ec Beer-sheba; eisht hrog Abimelech er, as Phicol, ard-chaptan e heshaght-chaggee: as hyndaa ad gys cheer ny Philistinee.

33As ren Abraham keyll y hoiaghey ayns Beer-sheba, as ayns shen ren eh geamagh er ennym y Chiarn, yn Jee ooilley-niartal. 34As va Abraham ny hroailtagh ayns cheer ny Philistinee ymmodee laghyn.