CAB. XXIV

1Cur-my-ner, ta’n Chiarn jannoo yn thalloo follym-faase; as jannoo eh ny fadaneys, chyndaa eh bun-ry-skyn, as skeayley dy lhean ny cummaltee echey. 2As shen myr vees eh, dy jean y pobble as y saggyrt farrail co-laik; yn fer-mooinjerey as e vainshtyr; yn charvaant as e ben-ainshtyr; yn kionneyder as y creckeyder; yn eeaseyder as yn eeaseydagh; yn tackeyder as yn tackeydagh; dy jean ad ooilley farrail co-laik. 3Bee yn cheer faagit follym-feayn, as dy bollagh er ny spooilley: son ta’n Chiarn er loayrt y fockle shoh. 4Ta’n cheer dobberan as shymley ersooyl; ta’n seihll gannooinaghey, as lheïe ersooyl; ta mooaralee mooar y theihll ayns doogh-treihys. 5Ta’n cheer myrgeddin fo loght folley liorish ny cummaltee echey, er-yn-oyr dy vel ad er chassey ny leighyn, er chaghlaa ny oardaghyn, as er vrishey yn conaant dy bragh farraghtyn. 6Shen-y-fa ta’n mollaght er stroie yn cheer, as ta e chummaltee currit mow: shen-y-fa ta fir-vaghee ny hooirey losht, as beggan deiney faagit. 7Ta’n feeyn noa goll eig, ta’n billey-feeyney fioghey, ta ooilley yn vooinjer ghennal-chreeagh gosnaghey. 8Ta bingys tabretyn scuirr, ta’n reaïd ocsyn ta jannoo gien mie harrish, ta kiaull yn chlaasagh ny host. 9Cha jean ad giu feeyn lesh arrane; bee jough lajer skeayagh dauesyn ta dy iu eh. 10Ta’n ard-valley anveagh er ny vrishey sheese, ta dy chooilley hie dooint seose, nagh vod dooinney erbee goll stiagh orroo. 11Ta yllaghey son feeyn ayns ny straïdyn, ta dy chooilley voggey er ny vooghey, ta gennallys yn cheer er n’immeeaght. 12’Syn ard-valley ta traartys taaghey, as ta’n giat er ny woalley lesh toyrt-mow.

13Agh foast shoh myr vees eh ayns mean y cheer mastey’n pobble: dy bee eh myr craa yn villey-olive, as myr jeelym messyn-feeyney jerrey’n ouyr. 14Troggee ad seose nyn goraa, gowee ad arrane gys ard-ooashley yn Chiarn, nee ad gyllaghey dy ard veih’n aarkey. 15Shen-y-fa jean-jee yn Chiarn y ghloyraghey ayns ny coanyn, dy jarroo ennym y Chiarn, Jee Israel, ayns ellanyn yn aarkey.

16Veih’n ard sodjey magh jeh’n theihll ta shin er chlashtyn arraneyn, eer gloyr gys yn er-cairal. Agh dooyrt mish, My voghtynid, my voghtynid, smerg dou! ta ny dellaryn cluicagh er ghellal dy molteyragh; dy jarroo ta ny dellaryn cluicagh er ghellal feer volteyragh. 17Ta aggle, as yn ooig, as y ribbey ort’s, O chummaltagh y thallooin. 18As hig eh gy-kione, dy jean eshyn ta chea veih feiyr yn aggle tuittym ’syn ooig; as dy bee eshyn chosnys seose ass yn ooig goit ayns y ribbey: son ta uinniagyn yn yrjey foshlit, as ta undinyn y thallooin er-creau. 19Ta’n thalloo er ny vrishey ayns peeshyn, ta’n ooir dy glen er lheïe ersooyl, ta’n thalloo dy atchimagh er ny chraa. 20Nee’n thalloo leaystey noon as noal myr dooinney meshtal, as bee eh er ny astyrt myr bwaag; as bee e loght errey hrome er; as nee eh tuittym, as cha n’irree eh arragh. 21As hig eh gy-kione er y laa shen, dy jean y Chiarn kerraghey sheshaght ny ard-vooaralee ’syn yrjey, as reeaghyn ny hooirey er yn ooir. 22As bee ad er nyn jaglym cooidjagh myr ta pryssoonee chaglit ’sy dungeon, as bee ad jeight seose ’sy phryssoon; as lurg ymmodee laghyn nee’n Chiarn jeeaghyn orroo. 23Eisht bee yn eayst fo dorraghys, as bee yn ghrian fo dooid, tra nee Chiarn ny flaunyssee reill ayns cronk Zion, as ayns Jerusalem, as kiongoyrt rish e hanstyr, dy gloyroil.