CAB. LV

1Ho, dagh unnane ta paagh, tar-jee gys ny ushtaghyn, as eshyn ta gyn argid; tar-jee, kionnee-jee as ee-jee; dy jarroo, tar-jee, kionnee-jee feeyn as bainney fegooish argid, as fegooish leagh. 2Cre’n-fa ta shiu baarail nyn argid er shen nagh nee arran eh, as nyn laboraght er shen nagh vel jannoo magh shiu? Eaisht-jee dy imneagh rhym’s, as ee-jee shen ny ta mie, as lhig da’n annym eu goaill soylley ayns riurid. 3Croym-jee nyn gleaysh, as tar-jee hym’s; clasht-jee, as bee yn annym eu bio; as nee’m conaant dy bragh farraghtyn riu, dy jarroo myghinyn shickyr Ghavid. 4Cur-my-ner, ta mee er choyrt eh son feanish da’n pobble, ny reiltagh as fer-ynsee da’n pobble. 5Cur-my-ner, nee oo geamagh er ashoon nagh nhione dhyt; as nee ashoonyn joarree roie hood’s, er graih yn Chiarn dty Yee, as er graih Fer-casherick Israel; son t’eh er dty ghloyraghey.

6Shir-jee gys y Chiarn choud’s t’eh ry-gheddyn, eam-jee ersyn choud’s t’eh er-gerrey. 7Lhig da’n drogh ghooinney treigeil e raad, as y dooinney neu-ynrick e smooinaghtyn: as lhig da chyndaa gys y Chiarn, as bee myghin echey er; as gys y Jee ain, as nee eh dy arryltagh leih da.

8Son cha vel ny smooinaghtyn aym’s myr ny smooinaghtyn euish, chamoo ta ny raaidyn euish myr ny raaidyn aym’s, ta’n Chiarn dy ghra. 9Son myr ta ny niaughyn ny syrjey na yn thalloo, myr shen ta ny raaidyn aym’s ny syrjey na ny raaidyn euish, as ny smooinaghtyn aym’s erskyn ny smooinaghtyn euish. 10Son myr ta’n fliaghey cheet neose, as y sniaghtey veih’n aer, as nagh vel ad chyndaa reesht gys shen, derrey t’ad er ushtaghey yn ooir, as coyrt er gymmyrkey mess as blaaghey, dy chur magh rass da’n chorreyder, as arran da’n eeder; 11Shen myr vees my ghoo ta goll ass my veeal: cha jyndaa eh reesht hym’s neu-vreeoil; agh nee eh cooilleeney my aigney, as bee aïgh vie lesh ’sy chooish shen ta foym’s dy chooilleeney. 12Son hed shiu magh lesh boggey, as bee shiu er nyn leeideil ayns shee: nee ny sleityn as ny croink brishey magh ayns kiaulleeaght kiongoyrt riu, as nee ooilley biljyn y vagheragh nyn massyn y woalley. 13Ayns ynnyd y drine nee gaase seose yn billey-juys, as ayns ynnyd y dress hig seose yn billey-myrtle: as bee eh da’n Chiarn son ennym, son cowrey dy bragh farraghtyn, nagh bee er ny yiarey jeh.