CAB. VIII

1Ny-sodjey na shoh, dooyrt y Chiarn rhym, Gow lioar vooar, as scrieu ayn lesh goan baghtal mychione Maher-shalal-hash-baz. 2As ghow mee feanishyn firrinagh son recortys, Uriah yn saggyrt, as Zechariah mac Yeberechiah. 3As haink mee er-gerrey da my ven, as ren ee gientyn, as mac y ymmyrkey. Eisht dooyrt y Chiarn rhym, Jean genmys eh Maher-shalal-hash-baz: 4Son roish my bee tushtey ec y lhiannoo dy eam, My ayr, as my voir, bee berchys Ghamascus as spooilley Samaria goit ersooyl roish ree Assyria.

5Loayr y Chiarn rhym myrgeddin reesht, gra, 6Son wheesh as dy vel yn pobble shoh soiaghey beg jeh ushtaghyn Shiloah, ta roie dy shliawn, as cur nyn marrant er Rezin, as mac Remaliah; 7Nish er-y-fa shen, cur-my-ner, ta’n Chiarn cur lesh seose orroo ushtaghyn yn awin niartal as ymmodee, eer ree Assyria, as ooilley e ghloyr; as hig eh seose harrish ooilley e ammyryn, as lhieenee eh harrish ooilley e vrooinyn: 8As nee eh gimmeeaght trooid Judah; nee eh gatt as roie harrish nee eh roshtyn eer gys y wannal; as lesh sheeyney magh e skianyn nee eh lhieeney lheead yn cheer ayd’s, O Immanuel.

9Jean-jee conaant ry-cheilley, O shiuish phobble, agh bee shiu er nyn mrishey ayns peeshyn; as eaisht-jee ooilley shiuish cheeraghyn foddey jeh: cryss-jee miu [nyn gliwenyn], agh bee shiu er nyn mrishey ayns peeshyn; cryss-jee miu, agh bee shiu er nyn mrishey ayns peeshyn. 10Cur-jee nyn goyrle dy cheilley, agh hig eh gys veg: loayr-jee yn fockle, agh cha joan eh shassoo: son ta Jee mârin.

11Son shoh myr loayr y Chiarn rhym lesh laue niartal, as hug eh roym, gyn dy immeeaght ayns raad y phobble shoh, gra, 12Ny abbyr-jee, Nee mayd conaant roosyn ooilley, nee’n pobble shoh conaant roo; ny gow-jee aggle roish yn aggle ocsyn, chamoo bee-jee fo atchim. 13Jean-jee eer Chiarn ny flaunyssee hene y ghloyraghey, as lhig dasyn ve yn aggle euish, as lhig da ve nyn atchim. 14As bee eh diuish son coadey casherick; agh son clagh-snapperal, as son creg vees oyr tuittym, gys daa hie Israel; son sniem, as son ribbey, da cummaltee Yerusalem. 15As nee ymmodee ny mast’ oc snapperal, as tuittym, as bee ad brisht, as goit ’sy ribbey. 16Jean-jee yn recortys shickyr, seal-jee seose y leigh ny mast’ ocsyn ta geiyrt er my ynsagh. 17As nee’m farkiaght er y Chiarn, ta follaghey e eddin veih thie Yacob, as nee’m jeeaghyn er e hon. 18Cur-my-ner, ta mish, as my chloan ta’n Chiarn er chur dou, son cowraghyn as yindyssyn ayns Israel: veih Chiarn ny flaunyssee, ta cummal ayns cronk Sion.

19As tra jir ad riu, Gow-jee coyrle jeusyn ta spyrrydyn faishnee oc, as jeh ny fir-obbee, ta meekeyragh as tassane; nagh lhisagh pobble briaght jeh nyn Yee? cha nee ny bioee jeh ny merriu? 20Shir-jee gys y leigh as gys y recortys: mannagh vel ad loayrt cordail rish yn goo shoh, te er-yn-oyr nagh vel veg y toilshey ayndoo. 21As hed ad trooid y cheer ayns chennid ghyere, as gortey: as hig eh gy-kione, tra vees ad roit neeu lesh accyrys, dy bee ad ayns lheid yn angaish dy jean ad gwee mollaght er nyn ree as nyn Yee, as jeeaghyn seose. 22As nee ad jeeaghyn er y thalloo; as cur-my-ner seaghyn as dorraghys, dooid dy angaish; as bee ad er nyn imman gys dorraghys.