CAB. IX

1Ny-yeih, cha bee yn dorraghys lheid as ve tra v’ee seaghnit, tra ren eh dy eddrym ec y toshiaght seaghney cheer Zebulun as cheer Naphtali, as ny lurg shen ren eh ny s’trimmey seaghney ee er slyst ny marrey, cheu elley dy Yordan, ayns Galilee jeh ny ashoonyn. 2Ta’n pobble va shooyl ayns dorraghys er vakin soilshey mooar: orroosyn va cummal ayns cheer scadoo yn vaaish ta’n soilshey er n’irree. 3T’ou er vishaghey yn ashoon, as cha vel oo er vooadaghey nyn moggey: t’ad goaill boggey kiongoyrt rhyt, rere boggey yn ouyr, as myr ta deiney goaill boggey tra t’ad rheynn y chragh. 4Son t’ou er vrishey yn whing trome echey, as lorg e gheaylin, slatt e hranlaasagh, myr ayns laa Vidian. 5Son ta dy chooilley vagher-caggee yn treanagh lesh tharmane boiragh, as garmadyn seiyt ayns fuill; agh bee shoh lesh lostey, as stoo son yn aile. 6Son dooinyn ta lhiannoo er ny ruggey, dooinyn ta mac er ny choyrt, as bee yn reiltys er e gheaylin; as bee eh enmyssit, Yn Er-yindyssagh, Fer-coyrlee, Yn Jee niartal, Yn Ayr dy bragh beayn, Yn Prince dy hee. 7Er mooadys e reill as e hee cha bee jerrey, er stoyl-reeoil Ghavid, as er e reeriaght, dy oardrail eh, as dy niartaghey eh lesh briwnys as cairys, veih’n traa shoh magh eer son dy bragh. Graih jeean Chiarn ny flaunyssee nee shoh y chooilleeney.

8Hug y Chiarn goo gys Jacob, as te er duittym er Israel. 9As yiow ooilley’n pobble fys er, dy jarroo Ephraim, as cummaltee Samaria, ta gra ayns moyrn as dunnallys nyn gree, 10Ta ny breekyn er duittym, agh nee mayd thieyn y hroggal jeh claghyn cummit; ta ny biljyn-sycamore giarit sheese, as soie-ee mayd ayns nyn ynnyd biljyn-cedar. 11Shen-y-fa nee yn Chiarn soiaghey seose noidyn Rezin n’oï-syn, as tayrn ad dy cheilley; 12Ny Syrianee er e veealloo, as ny Philistinee er e chooylloo; as nee ad Israel y stroie lesh beeal foshlit. Son ooilley shoh cha vel e yymmoose er ny hyndaa ersooyl, agh ta e laue foast sheeynt magh.

13Son cha vel y pobble chyndaa huggeysyn ta dy smaghtaghey ad, chamoo t’ad shirrey gys Chiarn ny flaunyssee. 14Shen-y-fa nee yn Chiarn giarey jeh Israel veih bun dy baare, eer bangan as fraue ’syn un laa. 15Yn chenn as onnoroil, eshyn y bun; as y phadeyr ta gynsaghey breagyn, eshyn y baare. 16Son ta leeideilee yn phobble shoh coyrt ad er-shaghryn, as t’adsyn er nyn stroie ta er ny leeideil lioroo. 17Shen-y-fa cha bee veg y taitnys ec y Chiarn ayns ny deiney aegey oc, chamoo vees myghin echey er y chloan gyn ayr, as ny mraane-treoghe: son t’ad ooilley crauee-oalsey as nyn ghrogh-yantee as ta dy chooilley veeal loayrt ommijys. Son ooilley shoh cha vel e chorree chyndaït ersooyl, agh ta e laue foast er ny heeyney magh.

18Son ta mee-chraueeaght lostey myr yn aile: nee eh stroie ny dressyn as ny drineyn, as nee eh foaddey ayns thammagyn ny keylley; as troggee ad seose myr y jaagh-chassee neealloo yn aer. 19Liorish jymmoose Chiarn ny flaunyssee ta’n cheer fo dorraghys, as bee’n pobble myr stoo cour yn aile: cha jean dooinney erbee lhiggey lesh e vraar. 20As nee eh greimmey er y laue yesh, as bee eh accryssagh; as nee eh gee er y laue chiare, as cha bee ad jeant magh: nee dagh dooinney jeu gee feill yn roih echey hene: 21Manasseh noi Ephraim, as Ephraim noi Manasseh; as bee ad nyn-neesht noi Judah. Son shoh as ooilley cha vel e yymmoose er ny chastey, agh ta e laue foast er ny heeyney magh.