CAB. VI

1Clasht-jee nish cre ta’n Chiarn dy ghra, Irree, gow seose yn chooish noi ny sleityn, as lhig da ny croink clashtyn dty choraa. 2Clasht-jee, O shiuish sleityn, rish cooish y Chiarn, as shiuish undin lajer y thallooin: son ta argane ec y Chiarn rish e phobble, as nee eh pleadeil rish Israel. 3O my phobble, cre ta mee er n’yannoo rhyt, as cre ayns ta mee er n’yannoo deinagh jeed? jean gymmyrkey feanish m’oï. 4Son hug mee lhiam oo seose ass cheer Egypt, as ren mee oo y livrey ass thie ny bondiaght, as hug mee oo fo laue Voses, Aaron, as Miriam. 5O my phobble, cooinee-jee nish er y choyrle ghow Balak ree Voab, as cre ren Balaam mac Veor eh y reggyrt voish Shittim gys Gilgal, dy vod shiu toiggal cairys y Chiarn.

6Cre lesh hig-ym kiongoyrt rish y Chiarn, as mee hene y chroymmey fenish y Jee ard? jig-ym kiongoyrt rish lesh ourallyn-losht, as lesh gounee jeh bleïn dy eash? 7Bee yn Chiarn er ny wooiys lesh thousaneyn dy reaghyn, ny lesh jeih thousaneyn dy awinyn ooil? der-ym my vac shinney son my vee-viallys, mess my chorp son peccah my annym? 8T’eh er hoilshaghey dhyt O ghooinney, cre ta’n mie; as cre ta’n Chiarn shirrey jeed, agh dy yannoo dy cairal, as dy chur graih da myghin, as dy immeeaght dy imlee marish dty Yee? 9Ta coraa yn Chiarn geamagh gys yn ard-valley, as ver y dooinney tushtagh geill da dty ennym: gow-jee tastey jeh’n clatt, as jehsyn ren goardrail eh.

10Vel foast ny tashtaghyn dy vee-chairys ayns thie ny mee-chairal, as yn towse giare ta feohdagh? 11Jean-ym ad y choontey glen lesh meihaghyn foalsey, as lesh spagey dy howseyn molteyragh? 12Son ta ny deiney berchagh oc nyn ard-hranlaasee, as ta ny cummaltee cur-rish breagyn, as ta’n chengey oc molteyragh ayns nyn meeal. 13Er-y-fa shen myrgeddin, bwoaill-ym oo lesh chingys as traartys, kyndagh rish dty pheccaghyn. 14Nee oo gee, agh cha bee oo er dty yannoo magh, as bee dty lhieggey er cheu-sthie jeed, as nee oo greimmey, agh cha jean oo livrey: as shen t’ou livrey, ver-ym seose gys y chliwe. 15Nee oo cuirr, agh cha jean oo buinn: nee oo broo ny oliveyn, agh cha jean oo oo-hene y ooilaghey lesh ooil; as feeyn noa, agh cha jean oo giu feeyn.

16Son ta slattyssyn Omri freilt, as ooilley cliaghtaghyn thie Ahab, as ta shiu gimmeeaght lurg ny coyrleyn ocsyn, dooys dy yannoo uss dty hraartys, as dty chummaltee son faghid; shen-y-fa nee shiu gymmyrkey oltooan my phobble.