PSAL. XXX

1Ver-yms ard-voylley dhyt’s, O Hiarn, son t’ou er my hoiaghey seose: as cha vel oo er lhiggey da my noidyn dy ve mooaralagh harrym.

2O Hiarn my Yee, deïe mee hood: as t’ou er my lheihys.

3T’ou uss, Hiarn, er livrey m’annym veih’n oaie: t’ou er vreayll my vioys veih goll sheese gys ooig y vaaish.

4Gow-jee arraneyn-moyllee gys y Chiarn, O shiuish e nooghyn: as cur-jee booise da ayns cooinaghtyn jeh e chasherickys.

5Son cha vel e chorree farraghtyn agh meekey sooilley, as ayns y foayr echey ta bea: foddee trimshey farraghtyn son oie, agh ta boggey cheet ’sy voghrey.

6Ayns my staydoilys dooyrt mee, Cha bee’m dy bragh er my scughey: t’ou uss, Hiarn, jeh dty vieys, er n’yannoo my chronk cha lajer.

7Hyndaa oo dt’eddin voym: as va mee seaghnit.

8Eisht deïe mish hood’s, O Hiarn: as chossyn mee gys my Hiarn dy feer imlee.

9Cre’n vondeish t’ayns my uill: tra hem sheese gys yn oaie?

10Der y joan booise dhyt: ny jean eh soilshaghey dt’ynrickys?

11Clasht, O Hiarn, as jean myghin orrym: Hiarn, bee uss my er-coonee.

12T’ou er hyndaa my hrimshey gys boggey: t’ou er choyrt jee’m my aanrit-sack, as er my choamrey lesh gennallys.

13Shen-y-fa nee dy chooilley ghooinney mie goaill arrane jeh dty voylley fegooish skeeys: O my Yee, ver-yms booise dhyt son dy bragh.