PSAL. LV

1Clasht rish my phadjer, O Yee: as ny follee oo hene veih my accan.

2Gow tastey jee’m, as eaisht rhym: kys ta mee gaccan ayns my phadjer, as ta mee seaghnit.

3Ta lheid yn yllagh er my noid, as ta ny mee-chrauee cheet orrym cha chion: son t’ad kiarit dy yannoo olk ennagh dou, cha goanlyssagh shen t’ad soit m’oï.

4Ta my chree anveagh cheu-sthie jee’m: as ta aggle y vaaish er duittym orrym.

5Ta aggle as creau er jeet orrym: as ta atchim seaghnagh er my hilgey harrish.

6As dooyrt mee, O dy beagh aym skianyn myr t’ec calmane: son eisht etlin ersooyl, as veign ec fea.

7Cur-my-ner, yinnin eisht cosney roym foddey jeh: as fuirriaght ayns yn aasagh.

8Yinnin siyr dy scapail: kyndagh rish y gheay stermagh as y dorrin.

9Stroie ny chengaghyn oc, O Hiarn, as cur ad noi-ry-hoi: son ta mee er vakin neu-chairys as streeu ayns yn ard-valley.

10Laa as oie t’ad goll mygeayrt ny voallaghyn eck: ta olkys neesht as trimshey ’sy vean eck.

11Olkys t’ayn: cha vel molteyraght as foalsaght goll ass ny straidyn oc.

12Son cha nee noid foshlit t’er n’yannoo yn vee-onnor shoh dou: son eisht oddin v’er ymmyrkey eh.

13Chamoo she fer va ayns drogh-aigney dou hrog eh-hene seose m’oï: son eisht foddee dy beign er vollaghey mee hene veih;

14Agh oo hene v’ayn, my heshey: my leeideilagh, as my charrey ainjyssagh.

15Ghow shin coyrle villish cooidjagh, as ren shin shooyl gys thie Yee myr caarjyn.

16Lhig da baase cheet orroo dy siyragh, as lhig daue goll sheese bio ayns yn oaie: son ta olkys ayns nyn gummallyn, as ny mast’ oc.

17Er my hon’s, eïe-ym er Jee: as nee’n Chiarn m’y hauail.

18Fastyr, as moghrey, as ec y vun-laa nee’m padjer y ghoaill, as shen dy jeean: as clynnee eh my choraa.

19She eshyn ta er livrey m’annym ayns shee, veih’n chaggey va m’oï: son va ymmodee mârym.

20Dy jarroo, Jee hene, ta farraghtyn dy bragh, nee m’y chlashtyn, as ver lesh adsyn sheese: son cha jean ad chyndaa, ny goaill aggle roish Jee.

21Chur eh e laueyn orroosyn va ayns shee rish: as vrish eh e chonaant.

22Va goan e veeal ny s’buiggey na eeym, as caggey ayns e chree: va e ghoan ny shliawney na ooil, as foast t’ad cliwenyn hene.

23O tilg dty errey er y Chiarn, as nee eh dty chummal seose: as cha lhig eh da’n fer-cairagh tuittym son dy bragh.

24Agh er nyn son ocsyn: ver uss lhiat ad, O Yee, ayns yn ooig dy hoyrt-mow.

25Cha bee ny deiney folley as molteyragh bio yn derrey lieh jeh nyn laghyn: agh bee my hreishteil aynyd’s, O Hiarn.