PSAL. LXXII

1Cur da’n ree dty vriwnyssyn, O Yee: as dty chairys da mac y ree.

2Eisht nee eh dty phobble y vriwnys cordail rish cairys: as nee eh ny boghtyn y endeil.

3Ver ny sleityn myrgeddin lhieu shee: as ny croink veggey cairys da’n pobble.

4Freillee eh yn vooinjer ôney ayns nyn gair: cloan y voght nee eh y endeil, as ny tranlaasee y cherraghey.

5Gowee ad aggle royd choud as ta’n ghrian as yn eayst er-mayrn: veih un heeloghe gys sheeloghe elley.

6Hig eh neose myr y fliaghey ayns loamrey olley: dy jarroo myr ny bineyn ta gushtaghey yn thalloo.

7Ayns y lhing echeysyn nee yn vooinjer chairagh bishaghey: dy jarroo, as palchey dy hee, choud as ta’n eayst farraghtyn.

8Bee yn reiltys echey myrgeddin veih un aarkey gys faarkey elley: as veih’n awin vooar gys ayrnyn sodjey yn ooir.

9Adsyn ta baghey ’syn aasagh nee ad gliooney sheese kiongoyrt rish: nee e noidyn yn joan y liee.

10Reeaghyn Tarshish as ny ellanyn ver ad lhieu toyrtyssyn: ver reeaghyn Arabia as Saba lhieu giootyn.

11Nee dy chooilley ree tuittym sheese kiongoyrt rish: nee dy chooilley ashoon eh y hirveish.

12Son nee eh yn boght y livrey, tra t’eh geam: yn ymmyrchagh neesht, as eshyn nagh vel fer-coonee erbee echey.

13Bee eh foayroil da’n vooinjer ôney as ny ymmyrchee: as nee eh anmeenyn ny boghtyn y choadey.

14Nee eh ny anmeenyn oc y livrey veih foalsaght as aggair: as deyr vees yn uill oc ayns e hilley.

15Bee eh bio, as dasyn vees er ny choyrt jeh airh Arabia: bee padjer er ny yannoo dy kinjagh huggey, as gagh laa vees moylley er ny choyrt da.

16Bee palchey arroo er y thalloo, ard er ny croink: nee’n mess echey craa myr Libanus, as bee eh glass ’syn ard-valley myr faiyr er y thalloo.

17Nee yn ennym echey farraghtyn son dy bragh, bee yn ennym echey er-mayrn fo’n ghrian mastey ny sheelogheyn ta foast ry-heet: vees er nyn mannaghey ny hrooidsyn, as nee ooilley ny ashoonyn eh y voylley.

18Bannit dy row yn Chiarn Jee, dy jarroo yn Jee dy Israel: ta ny-lomarcan jannoo reddyn yindyssagh.

19As bannit dy row ennym yn Ard-ooashley echey son dy bragh: as bee ooilley yn seihll er ny lhieeney lesh e Ard-ooashley. Amen, Amen.