PSAL. LXXXI

1Lhig dooin arrane gennal y ghoaill gys Jee nyn niart: jean-jee kiaull gherjoil y yannoo gys Jee Yacob.

2Gow-jee arrane-moyllee, lhieu-jee ayns shoh yn tabret: yn chlaasagh villish, as y lute.

3Sheid-jee yn cayrn dy ard ec yn eayst-noa: dy jarroo ec y traa ta pointit, as er y laa-feailley casherick ain.

4Son va shoh er ny yannoo ny lattys son Israel: as ny leigh liorish Jee Yacob.

5Shoh doardee eh ayns Joseph son recortys: tra haink eh magh ass cheer Egypt, as er chlashtyn glare yoarree.

6Hug mee aash da ny geayltyn echey veih’n errey: as va ny laueyn echey er nyn livrey veih jannoo ny pooiyt.

7Deïe oo orrym ayns seaghyn, as livrey mee oo: as hug mee clashtyn dhyt tra shen huitt y sterrym ort.

8Phrow mee oo myrgeddin: ec ushtaghyn y streeu.

9Clasht-jee, O my phobble, as nee’m soilshaghey dhyt, O Israel: my nee oo geaishtagh rhym’s,

10Cha bee Jee erbee joarree aynyd’s: chamoo ver oo ooashley da Jee erbee elley.

11Mish y Chiarn dty Yee, hug lhiam uss magh ass thalloo Egypt: foshil dty veeal dy lhean, as lhieen-ym eh.

12Agh cha baillish my phobble geaishtagh rish my choraa: as cha baillish Israel biallys y choyrt dou.

13Myr shen livrey mee ad seose gys sayntyn nyn greeaghyn hene: as lhig mee daue geiyrt er ny smooinaghtyn fardalagh oc hene.

14O dy beagh my phobble er n’eaishtagh rhym’s: son dy beagh Israel er n’immeeaght ayns my raaidyn.

15Veign dy leah er choyrt sheese ny noidyn oc: as er hyndaa my laue noi ny tranlaasee oc.

16Veagh adsyn va dwoaie oc er y Chiarn er ny gheddyn nyn mreageryn: agh veagh y traa ocsyn er varraghtyn son dy bragh.

17Veagh eh er veaghey ad myrgeddin lesh y flooyr curnaght s’glenney: as lesh mill ass y chreg chloaie veign er dty yannoo magh.