CAB. XIII

1As ayns y laa shen bee farrane er ny osley da thie Ghavid, as da cummaltee Yerusalem, son peccah, as son neu-ghlennid. 2As hig eh gy-kione ta Chiarn ny flaunyssee dy ghra, dy giare-ym jeh ennym ny jallooyn ass y cheer, as cha bee cooinaghtyn sodjey jeu: as neem’s scughey myrgeddin ny phadeyryn, as y spyrryd neu-ghlen ass y cheer. 3As hig eh gy-kione, tra nee fer erbee phadeyrys, dy jir e ayr as e voir hooar eh, gra rish, Cha bee oo bio; son t’ou fockley-magh breagyn ayns ennym y Chiarn: as nee e ayr as e voir hooar eh, roie trooid e chorp eh, tra t’eh jannoo phadeyrys. 4As hig eh gy-kione ayns y laa shen, dy bee ny phadeyryn naareydagh, dagh unnane oc jeh e ashlish, tra t’ad er n’yannoo phadeyrys; chamoo nee ad ceau garmad geyshteenagh dy volley sleih. 5As jir eh, Cha nee phadeyr mee, she eirinnagh mee; son dynsee dooinney mee veih my aegid dy vochillaght ollagh. 6As jir fer rish, Cre ny lhottyn ad shoh t’ayns dty laueyn? Eisht nee eh freggyrt, T’ad shoh ny lhottyn hooar mee ayns thie my chaarjyn.

7Dooisht, O chliwe, noi my vochilley, as noi yn dooinney ta my heshey, ta Chiarn ny flaunyssee dy ghra: bwoaill yn bochilley, as bee ny kirree er ny skeayley: as chyndaa-ym my laue er y vyn-vooinjer. 8As hig eh gy-kione, trooid ooilley yn cheer, ta’n Chiarn dy ghra, dy bee daa ayrn jeh ny t’ayn er ny yiarey jeh, as er ny choyrt gys baase, agh bee yn trass ayrn faagit ayn. 9As ver-ym lhiam yn trass ayrn trooid yn aile, as nee’m ad y ghlenney myr ta arroo er ny ghlenney, as nee’m ad y phrowal myr ta airh er ny phrowal: as nee ad geamagh er my ennym’s, as nee’m ad y chlashtyn: as jir-ym, T’adsyn my phobble: as jir adsyn, Ta’n Chiarn my Yee.